ReeFiesta

Riba djaweps promé di yüni, mas ku 150 miembro di komunidat rònt Boneiru a bini huntu pa mustra nan sosten pa restorashon di koral i selebrá World Reef Awareness Day, ku a ser organisá pa Reef Renewal Foundation Bonaire (RRFB). ReeFiesta a brinda un oportunidat signifikativo i tangibel pa amantenan di bida bou di laman, tantu esnan nobo komo esnan eksistente, pa aktivamente kontribuí na esfuersonan di restorashon di koral na Boneiru.

E evento a kuminsá ku sambuyamentu sinkronisá na 10 sitio di kwekerij di koral i un tour di snòrkel guiá pa miembronan di e tim di RRFB i tambe staf eksperensiá di 13 operadó lokal di sambuyamentu (local dive operators). E sambuyadónan partisipante a yuda traha na 63 kwekerij di koral, tanten ku esnan ku a snòrkel a siña tokante e diferente téknikanan di restorashon ku RRFB ta usa, miéntras nan tabata bishitá e kwekerijnan i e sitionan di trasplantashon di koral.

Diving and snorkeling during the event © Reef Renewal Foundation Bonaire

Despues di un atardi di aktividatnan bou di awa, e grupo a bini huntu na e playa na Buddy Dive Resort pa un resepshon di selebrashon ku a inkluí diferente spich, rifa di regalo, i un kues interesante tokante restorashon di koral. Danki na donashonnan generoso di vários premio di operadónan lokal di sambuyamentu – inkluso lèsnan di sambuyá, ekipo di sambuyá, i otro merkansianan, e rifa a resultá un eksitoso fundraising.

RRFB su Chief Operating Officer Francesca Virdis a habri e anochi ku un spich inougural pa yama bon biní na tur invitado i duna rekonosementu na Loretta Marshall, kende ta un boluntario di RRFB pa hopi tempu kaba. Monique van de Water, kende ta Senior Oceans Advisor di e programa di WWF-NL pa Karibe Hulandes, i Sra. Abigail Paula, kende ta Interim Country Manager di Orco Bank N.V., a tuma turno pa dirigí palabra na esnan presente, komo representantenan di e patrosinadónan di ReeFiesta 2023.

ReeFiesta 2023 a enfoká i mustra riba e esfuersonan kolektivo di personanan i organisashonnan ku ta komprometé na preservá e refnan di koral di Boneiru; e evento a konta ku mas di 80 hende nobo i vários simpatisante veterano di Reef Renewal Foundation Bonaire.

Visitors of ReeFiesta © Reef Renewal Foundation Bonaire

Historia di refnan

Deskubrí nos eksposishon >