Arjan de Groene, Koordinadó di Karibe

Ku su entrenamentu komo biólogo marino, Arjan a pasa hopi tempu rondó di refnan di koral i e hendenan ku ta dependé di nan. El a investigá e konekshon entre palunan di mangel (mangrove), yerba di laman, i refnan di koral na Zanzibar i Kòrsou i a traha mapa di refnan di koral na Seychelles. E tin masha interes pa sa kon ekosistemanan marino ta funshoná, i mas importante ainda, kon nos por sigurá ku e mondinan tropikal magnífiko akí ku ta bou di awa, lo keda intakto i sigui sostené e hendenan ku ta dependé di nan.

For di 2016 Arjan ta dunando sosten na nos timnan lokal na Boneiru i otro lugánan, pa traha un brùg entre organisashonnan den Karibe Hulandes, otro islanan Karibense i Hulanda.

Un di su metanan ta pa pone konservashon di naturalesa den Karibe Hulandes un prioridat den gobièrno Hulandes, pa sigurá ku komunidatnan lokal, tanto awor komo den futuro, por gosa di e bunitesa i benefisio di naturalesa.

Roxanne-Liana (Rox) Francisca, Mènedjer di e programa pa Karibe Hulandes

Rox a nase i a krese na Kòrsou, kaminda su interes pa e mundo bou di laman a kuminsá fo’i chikí. Ora el a mira su promé gutu ku siete aña di edat na Boneiru, esaki a krea un kuriosidat pa bida marino. Kon e ta move, aktua i ta forma manera un siudat bibá bou di awa. E interes akí a dirigí su rumbo pa studia siensia natural ku un enfoke fuerte riba biologia marino trópiko.

For di 2018, Rox ta aktivo den e mundu di konservashon i investigashon marino rònt Karibe. Komo un konsehero di ekologia i despues un mènedjer di áreanan protehá, el a kontribuí na investigashon i aktividatnan pa monitoriá, duna sosten na maneho stratégiko, duna informashon na públiko grandi i envolvimentu di komunidat. Trahando huntu ku ‘stakeholders’ lokal a mustra kon naturalesa, kultura i desaroyo ekonómiko ta konektá ku otro i kon importante e ta pa balansá esaki mirando ku e preshon di klima ta krese.

Den su funshon na WWF-NL, su meta ta pa kontribuí na haña i implementá solushonnan práktiko pa e retonan den área di konservashon di naturalesa, ku por fortalesé komunidatnan lokal. Banda di esaki, bo por haña Rox den naturalesa pa ‘hike’ òf pa sambuyá.

Evita Sanches, Konsehero di Komunikashon

Evita ta un eksperto den komunikashon ku ta gusta K.I.S.S. (Keep It Short and Simple). E ta kombertí informashon, tin biaha esun kompliká, tokante konservashon di naturalesa den Karibe Hulandes, den mensahenan i historianan konsiso pa tene tur kos simpel i kòrtiku pa tur públiko. Na WWF-NL e ta responsabel pa tur tareanan di komunikashon.

E ta apliká e konosementu ku el a optené di su grado di Master den Siensia di Komunikashon i su eksperensia komo ‘consultant’ di merkadeo i komunikashon, pa krea strategianan di komunikashon pa e region, ku e propósito pa informá, eduká, i envolví otronan.

Evita a biba i traha na Hulanda, Spaña, i Maroko, pero e ta keda un mucha tropikal. El a nase i krese na Sürnam i aktualmente ta bibando na Kòrsou. Ora ku e no ta traha, bo por hañ’é ta pasa tempu pafó, disfrutando di naturalesa.