Krea un Refugio Sigur pa Espesienan Emblemátiko

Un di e metanan riba término largu di WWF-NL ta pa krea un refugio sigur pa espesienan emblemátiko di Karibe Hulandes, dor di protehá nan den henter nan área di distribushon geográfiko. Pa por logra e meta akí, nos ta traha huntu ku partnernan lokal manera gobièrnunan i Dutch Caribbean Nature Alliance. Ademas nos ta enfoká riba e siguiente aktividatnan.

Redusí Menasa Kousá pa Hende Kontra e Espesienan Emblemátiko

Hopi espesie emblemátiko (turtuga, bayena, i tribon) ta move durante henter aña entre nan lugánan di kome i nan lugánan di reprodusí. Pa salbaguardiá e sobrebibensia di e espesienan akí, ta importante pa protehá nan durante e migrashon akí. E menasanan general ta konosí (p.e. nos ta trahando pa redusí e impakto di kaptura aksidental (’bijvangst’) di e animalnan akí rònt Karibe i tambe redusí e kantidat di sushi den laman den henter e área di Karibe), pero no tin klaridat riba kiko eksaktamente e impakto ta riba e animalnan akí. Ainda tin hopi falta di konosementu tokante kon e espesienan akí ta move den region i unda e menasanan ta krusa ku e movementunan akí, loke ta hasi difísil pa redusí e menasanan akí efektivamente. Un aktividat spesífiko pa kombatí e problema akí ta e desaroyo di un rapòrt di Blue Corridors Caribbean. Nos lo tuma akshon pa mehorá protekshon di espesienan emblemátiko basá riba rekomendashonnan di e rapòrt akí. Nos ophetivo ta pa mehorá konosementu, identifiká unda tin buraku, i traha programa- i plannan regional pa atendé ku menasanan riba nivel regional, i asina hasi Karibe un lugá mas sigur p’e por lo ménos dos espesie emblemátiko den Karibe Hulandes.

Ekspandé Kobertura i Mehorá Maneho di Áreanan Marino Protehá pa Espesienan Emblemátiko

Nos ke mehorá konosementu tokante tamaño di poblashon i patronchinan di migrashon di diferente espesie emblemátiko, manera bayena, turtuga i tribon. Esaki ta rekerí kooperashon mas fuerte den region, guiá pa organisashonnan ku ta atendé ku sierto espesienan spesífiko, manera Caribbean Cetacean Society i Sea Turtle Conservation Bonaire, i tambe mihó kolaborashon ku plataformanan eksistente (p.e., WIDECAST pa turtuganan). Tin datonan limitá disponibel pa sierto espesienan, pues nos meta ta pa yuda mehorá kolekshon di dato den region i identifiká burakunan ku tin pa loke ta trata protekshon. Den kolaborashon ku nos partnernan prinsipal, WWF-NL tin komo ophetivo yega na mihó protekshon di áreanan klave, dor di medinanan manera redusí e preshon di turismo riba espesienan di kosta i prohibí piskamentu direkto i indirekto riba bayena, dòlfein, tribon i turtuga den Áreanan Marino Protehá. Nos tambe ke ekspandé Yarari Marine Mammal and Shark Sanctuary pa otro islanan ruman.

Tiger Shark in Saba, Dutch Caribbean
Baby sea turtle in Bonaire, Dutch Caribbean

Historia di refnan

Deskubrí nos eksposishon >