Djabièrnè pasá hende yòn i grandi a bishitá e eksposishon Boneiru Bibu: Bou di Awa. Na Terramar Museum e eksposishon akí ta visualisá kon e komunidat diverso di Boneiru ta den kontakto ku laman. E eksposishon ta konsistí di portrètnan di Kenny Ranking, artefaktonan históriko i portrètnan di FuHiKuBo i pinturanan di e studiantenan di Liseo Boneriano.

Stacey Mac Donald di Wereld Natuur Fonds i e tim di Terramar Museum a bini ku e idea pa pone e oséano sentral den e eksposishon. “E komunidat Boneriano tin un relashon fuerte ku laman i konstantemente nan ta den kontakto kuné. Pero nos no ta realisá kon importante i delikado laman ta. Ku e proyekto akí nos ke uni diferente partinan di komunidat: di e piskadó, artista, usadó rekreativo, opservadó te ku e protektor di naturalesa.”

Di man robes pa man drechi: Elena Baker (Terramar Museum), Stacey Mac Donald (WWF-NL), studiante Sue-Ira Tweeboom, fotógrafo Kenny Ranking, Maya Narvaes (Terramar Museum)

E eksposishon ta partí den diferente sekshon. E portrètnan di Kenny Ranking ta mustra e interakshonnan entre laman i komunidat. Bo ta mira por ehèmpel hende ku ta landa, sùrf, disfrutando di laman. “Mi gusta kore rònt na Boneiru. Dor di saka portrèt regularmente mi ta drenta den kontakto ku hende. Nos ta papia tokante e manera kon nan ta eksperensiá nan besindario i Boneiru. E ta un kontraste ‘leuk’ pasó en general mi ta un persona introvertido”, e fotógrafo ta splika.

Un otro parti di e eksposishon ta mustra portrètnan i foyetonan bieu di programa di Bonaire Regatta, e kompetensia anual di zeilmentu ku ta ser organisá den òktober, pa ilustrá un parti di e historia di regata. Ora bo ta mira e portrètnan bieu i foyetonan di programa, bo por visualisá kon e paisahe, poblashon i nabegashon na Boneiru a kambia den 55 aña. Fundashon FuHiKuBo a kompartí e portrètnan i artefaktonan ku e museo.

E vishon di hóbennan tambe ta bini dilanti. Durante lès di biologia e studiantenan di Liseo Boneriano a traha pinturanan pa visualisá nan relashon ku laman. E studiantenan a pinta nan memorianan di laman i nan vishon pa ku e oséano. Pa stimulá un diálogo, bishitantenan por a duna kontesta riba e pregunta kon hende por tin un relashon duradero ku laman. E bishitante por a skirbi su opinion riba un blachi i pon’é riba un bòrchi.

Bòrchi ku opinionnan na e eksposishon

Rondó di Boneiru tin vários boto ku a senk. Un di nan, titulá Mairi Bahn òf Windjammer, a senk na aña 1912, e tabata mas ku 55 meter bou di awa i awor ta un lokalidat tékniko popular pa sambuyá. Ora e boto a senk, nan a kita e figura di kabes (‘boegbeeld’). Lodewijk Gerharts i Jules Heitkönig a hòrta e figura akí for di JatoBaco na aña 1952. Nan a pon’é den e bar di Hotel Zeebad, ku aktualmente ta Divi Flamingo Beach Resort. Marina Hulandes a hòrta e figura dos biaha i transportá esaki pa Hulanda. Afortunadamente e figura di kabes a regresá na Boneiru i na aña 1990 a bira propiedat di kapitan Don Stewart, kende a inisiá e industria di turismo di sambuyamentu na Boneiru. El a identifiká su mes komo un aktivista di medio ambiente i p’esei a pinta e uñanan di e figura di kabes bèrdè. Janet Thubault, su biuda, a fia Terramar Museum e figura di kabes na aña 2016. E figura akí tambe ta forma parti di e eksposishon. Informashon chistoso: e uñanan dje figura di kabes ta pintá bèrdè ketubai.

Por bishitá e eksposishon Boneiru Bibu: Bou di Awa te ku 4 di novèmber. E eksposishon ta forma parti di un proyekto kaminda Wereld Natuur Fonds den kolaborashon ku Terramar Museum lo organisá diferente aktividat. E proyekto tin un durashon di 2 aña.

Bishitantenan na e eksposishon