Earth Hour 2023 na Kòrsou
Rònt mundu miónes di hende, empresa i munisipionan a paga lus pa un ora durante e Earth Hour riba djasabra 25 di mart pa pidi atenshon pa nos naturalesa ku ta bastante vulnerabel. Na Kòrsou tambe a para ketu na Earth Hour. Ku kooperashon di Curaçao Ports Authority a paga e lusnan no-esensial riba e Koningin Emmabrug (Brùg di Ponton) durante 60 minüt.
Brùg di Ponton © WWF-NL / Clayton Lanoy
Hende den e área hasiendo pregunta tokante Earth Hour © WWF-NL / Clayton Lanoy
Earth Hour ta un inisiativa anual di e organisashon internashonal WWF (World Wide Fund for Nature). E inisiativa a kuminsá na 2007 na Sydney, Australia komo un akshon riba un eskala chikitu pa pidi atenshon pa kambio di klima. Den e siguiente añanan esaki a krese bira e movementu mundial di mas grandi pa protekshon di naturalesa. Aña pasá miónes di hende, negoshi i organisashonnan a partisipá den mas ku 190 pais i teritorio.
Masalmente ta paga lus di 8:30 te 9:30 p.m. ora lokal. Banda di pagamentu di lus, WWF ta pidi pa hasi algu positivo pa mas ku 60 minüt na bienestar di nos mundu (p’esei ta usa e logo di 60+). Esaki por ta por ehèmpel: piki sushi den bo bario, hasi mas na resiklahe, planta palu, etc.
WWF-NL ta e forsa tras di Earth Hour na Hulanda, pero entretantu eventonan ta ser organisá spontáneamente den henter e pais. WWF-NL a disidí e aña akí pa enbolbí Kòrsou tambe den e organisashon di e movementu di siudadano (grassroots movement) akí. Den Karibe e fundashon ta kuminsá ku Kòrsou promé, ku e meta pa ekspandé tur aña pa un otro isla den e parti Karibense di Reino. Ta importante pa e islanan tambe partisipá na Earth Hour, pasobra nos tur ta ser afektá pa kambio di klima. Islanan chikitu ta èkstra vulnerabel pa kambio di klima. Debí na subida di nivel di laman i e mundu ku ta kalentando, e chèns pa tempu ekstremo manera sekura ekstremo, inundashonnan pisá i orkan, ta hopi grandi. Esaki tin un impakto grandi riba ekonomia di e islanan, bienestar i prosperidat di e poblashon.
