Posishon pa ku Implementashon di e Plan di Maneho di Naturalesa i Medio Ambiente
Na komienso di 2022, a akordá ku gobièrnu hulandes a reservá 35 mion euro adishonal pa protekshon di naturalesa i maneho ambiental na Hulanda Karibense. E kantidat akí ta disponibel pa e Plan di Maneho di Naturalesa i Medio Ambiente pa Hulanda Karibense 2020 – 2030. Esaki ta un plan di protekshon di naturalesa i maneho di medio ambiente ku pa años e entidatnan públiko, ministerionan i organisashonnan lokal di protekshon di naturalesa a traha riba dje.
Den e plan tin stipulá entre otro ku mester redusí e preshon riba koralnan pa e refnan aktual di koral por rekuperá. Entre otro polushon i e impakto di kambio di klima, ta algun di e faktornan ku ta poniendo na peliger e sobrebibensia di e refnan di koral, i por lo tanto, di turismo tambe. No solamente mester redusí e preshon ku tin riba e koralnan, pero tambe mester duna debido atenshon na ekosistemanan terestre spesial ku ta na peliger, manera e mondi tropikal seku.
Sinembargo, for di tempu ku a traha e Plan di Maneho di Naturalesa i Medio Ambiente (PMNMA) mas ku dos aña pasá, masha poko a sosodé konkretamente na Boneiru pa realmente protehá i manehá naturalesa i medio ambiente mihó riba e isla. Esnan ku tin ku ehekutá e PMNMA apénas por a dal algun paso pa move di un proseso di maneho pa protekshon di naturalesa den práktika.
Puntonan di Akshon
Pa un bon ehekushon di e Plan di Maneho di Naturalesa i Medio Ambiente, tin dos punto di akshon ku mester tuma lugá.
Na promé lugá, gobièrnu di e isla tin ku stipulá e programa di implementashon. Den dje ta indiká e akshonnan, metanan i prioridatnan ku lo ser ehekutá i na ki momentu den e próksimo añanan. Ta esensial pa e gobièrnu di e isla tuma kòntròl i responsabilidat di e maneho di naturalesa na Boneiru. E segundo punto di akshon ta ku e gobièrnunan lokal i nashonal mester duna klaridat tokante kon e presupuestonan lo ser repartí pa Bonaire. Antó kon nos por sòru pa e sèn akí ser usá mas lihé posibel di un manera efektivo?
Más ku dos aña despues di publikashon di e Plan di Maneho di Naturalesa i Medio Ambiente, no tin tempu pa pèrdè mas. Ta urgente pa hasi algu, para e deterioro di naturalesa na Boneiru i kuminsá ku restorashon aktivo di naturalesa i maneho di medio ambiente. Komo organisashonnan di naturalesa, nos sa kiko nos tin ku hasi pa protehá naturalesa na Boneiru i nos ta dispuesto na hasi esei. Solamente nos ta pidi klaridat i disponibilidat di parti di gobièrnu pa duna e aprobashonnan i fondonan nesesario pa por hasié rápidamente.
Skibí dor di STINAPA, ECHO, Mangrove Maniacs, Reef Renewal Bonaire, Sea Turtle Conservation Bonaire, BonBèrde, Terabarra i World Wide Fund for Nature the Netherlands.