Nivel di awa ku ta subiendo ta menasá na guli un kinto parti di Boneiru

Investigashon hasí pa Vrije Universiteit Amsterdam bou di enkargo di Greenpeace, ta mustra ku e konsekuensianan di kambio di klima pa Boneiru ta desastroso. Olanan di kalor ta oumentando i refnan di koral, ku ta fungi komo barera natural kontra di olanan haltu, ta disparsiendo. E nivel di awa ku ta subiendo ta menasá na guli un kinto parti di e isla na fin di e siglo akí. WWF-NL huntu ku otro organisashonnan di defensa di naturalesa, pa años a bin ta traha pa salbaguardiá refnan di koral saludabel rondó di e isla i awor ta hasi un apelashon na gobièrnu Hulandes pa implementá e Plan di Maneho di Naturalesa i Medio Ambiente, ku ta vigente for di aprel 2020.

Koral na Boneiru © WWF-NL / Pieter de Groot

Refnan Saludabel = Resiliensia pa Klima

Refnan saludabel ta mas resiliente pa ku efektonan di kambio di klima i por sigui funshoná komo barera kostal natural ku por yuda prevení inundashon. E investigashon ekstenso di Vrije Universiteit tokante e konsekuensianan di kambio di klima pa Boneiru ta konfirmá e urgensia pa medidanan rápido i efektivo pa salba refnan di koral. E investigashon ta yega na e siguiente konklushon tokante e refnan di koral rondó di Boneiru:

E presioso ref di koral rondó di Boneiru ta forma un barera kostal natural ku ta yuda protehá e isla kontra inundashon. Ademas, e ref di koral ta profundamente konektá ku e identidat Boneriano, un ‘kraamkamer’ pa bida marino i mundialmente konosí entre sambuyadónan. Su futuro ta na peliger debí na kambio di klima. Solamente den e senario di klima di mas optimista, djis bou di e meta di e Akuerdo di Klima di Paris, lo no tin konsekuensia grandi na 2050. Pero den e senario di klima di mas ekstremo, asina tantu koral lo muri, ku pa 2050 solamente 13 di e 86 sitionan di sambuyá lo sobrebibí. Komo resultado, turismo di buseo (‘duiktoerisme’) lo baha, i lo e tin un impakto negativo masha grandi riba ekonomia. Konforme tur ekspektativa, e morto di koral lo sigui despues di 2050. Resultado di esaki lo ta ku tin gran probabilidat ku tur koral lo a disparsé pa fin di siglo.

Gobièrnu Hulandes: tempu pa akshon

Greenpeace tin intenshon pa huntu ku habitantenan di Boneiru, entamá un kaso den korte kontra e Estado Hulandes pa fòrsa gobièrnu pa tuma akshon di klima. WWF-NL ta sostené e atenshon ku Greenpeace ta pidiendo. WWF-NL, huntu ku otro organisashonnan di defensa di naturalesa na Boneiru, tambe ta preokupá pa e implementashon di e Plan di Maneho di Naturalesa i Medio Ambiente. E plan ta kla pa ser implementá for di april 2020 i mas ku 35 mion euro a ser hasí disponibel e aña akí. Lamentablemente ta resultá difísil pa Boneiru implementá esaki i ainda no a tuma akshon pa ehekutá e plan akí na e isla. Nos ta hasi un apelashon na gobièrnu pa resolvé a korto plaso e problemanan ku ta stroba implementashon.