E siman akí e sektor mundial di teknologia di awa ta bini huntu na Leeuwarden, Hulanda, pa e segundo European Water Technology Week (EWTW 2022). Lidernan di inovashon empresarial for di diferente pais ta bini huntu pa eksplorá oportunidatnan i kolaborashon ku negoshinan di teknologia di awa rònt mundu.

E kongreso i ‘tradeshow’ akí ta enfoká riba inovashon den teknologia di awa, i p’esei Boneiru su proyekto di Water Circles ta orguyoso di forma parti di e gran evento akí. Representantenan di tres partner di Water Circles, esta STINAPA, WEB i Water Alliance, ta partisipando aktualmente na e konferensia. Water Alliance, ku alabes ta ko-anfitrion dje evento akí, ta un kolaborashon úniko entre   kompanianan públiko i privá, servisionan di gobièrnu i institutonan edukashonal ku ta enbolbí den inovashon den teknologia di awa na Hulanda.

Representantenan di Water Alliance, WEB i STINAPA

Durante e evento, e partnernan akí a duna un presentashon pa splika e vishon, mishon i propósito di e proyekto di Water Circles. E intenshon di e proyekto ta pa introdusí solushonnan desentralisá pa purifiká awa sushi na Boneiru den un futuro serkano. E tim enkargá ku e proyekto di Water Circles ta tumando pasonan pa kuminsá ku un inisiativa piloto pa purifikashon di awa sushi i reusá e awa ku a ser purifiká, p’asina redusí polushon di laman i tambe protehá e refnan di koral i henter e ekosistema ku ta sostené e koralnan.

Partisipando na e kongreso akí, Water Circles tin tambe e oportunidat pa eksplorá teknologianan i ekiponan inovativo pa purifikashon di awa sushi ku por fasilitá su mishon den futuro. E otro partnernan orguyoso di Water Circles ta WWF-NL, OLB i Fundashon Mariadal.