Resientemente, e di shete ‘International Marine Debris Conference’ (7IMDC) a tuma lugá na Busan, Surkorea. Carolyn Caporusso, konsehero di Wereld Natuur Fonds Nederland (WWF-NL) pa e programa di Karibe Hulandes i koordinadó di Clean Coast Bonaire, a partisipá n’e konferensia pa duna su presentashon, titulá ‘Kreando un ret pa harmonisá kòntròl di sushi marino den e region amplio di Karibe’.

Sushi marino ta un menasa ambiental, sosial i ekonómiko serio na tur kontinente, inkluso e region di Karibe. Polushon di plèstik ta un menasa pa e ekonomia blou di e region amplio di Karibe. Ta p’esei WWF-NL, representando Karibe Hulandes, tambe a partisipá n’e konferensia akí. E presentashon di Sra. Caporusso a ser duná komo parti di e seshon tékniko di e Region di Karibe den e konferensia. El a duna un resúmen di e Plan di Akshon pa kòntròl harmonisá di sushi marino ku el a prepará pa e Programa di Medio Ambiente Karibense di Nashonnan Uní. E Plan di Akshon ta rekomendá pa adoptá un enfoke di kòntròl basá riba e programa di Clean Coast Bonaire ku WWF-NL a implementá na 2018.

Carolyn Caporusso

E enfoke akí ta usa enbolbimentu di siudadanonan pa kòntròl di sushi marino i alabes ta sigurá un kalidat haltu di kolekshon di dato na sierto sitionan pre-selektá. Sra. Caporusso a definí un strategia i a krea un guia, pa di un manera ekonómiko i fásilmente replikabel por kolektá datonan harmonisá i di kalidat haltu tokante sushi marino, ku por ser usá pa guia i verifiká e efektividat di maneho di redukshon di polushon. E informashon akí por ser usá tambe pa konsientisashon i alabes sigurá ku datonan kolektá regionalmente den Karibe ta riba e mesun liña ku análisis i konsolidashon mundial di datonan di sushi marino. Esaki lo mehorá e base di konosementu nesesario pa desaroyá maneho i medidanan pa atendé ku sushi marino den e region amplio di Karibe.

Pasobra sushi marino ta krusa fronteranan nashonal, medidanan di redukshon ta nesesario riba nivel lokal, nashonal, regional i mundial. P’esei un di e tópikonan ku a ser tratá durante e konferensia tabata e desaroyo i implementashon regional di métodonan strukturá i koordiná pa kòntròl di sushi marino i alabes fomentá kolaborashon internashonal.

WWF-Korea a organisá un aktividat di konsientisashon kaminda hende mester a lastra bou di un nèt i imaginá kon nan ta un tortuga.

E konferensia tabata tambe un oportunidat pa partidonan kompartí perspektivanan kon pa sostené un tratado mundial nobo tokante plèstik, ku aktualmente ta den e proseso di negosashon entre paisnan miembro di Nashonnan Uní. E proseso akí lo mester hiba na un instrumento mundial legalmente obligatorio ku rekisitonan spesífiko i obligashonnan pa prevení i kombatí polushon di plèstik i su impaktonan tóksiko.

Durante e konferensia, mas ku 900 partisipante di 89 pais a bini huntu, representando gobièrnunan internashonal i ‘stakeholders’ di empresanan, institushonnan edukashonal, i organisashonnan no-gubernamental. Dunando e bon ehèmpel, e konferensia a ser kondusí komo un evento di sero-malgastamentu (‘zero-waste’), basá riba e prinsipio di redusí e volúmen i toksisidat di sushi i materialnan, antó konservá i rekobrá tur rekurso.

E konferensia a sirbi komo un plataforma mundial pa kompartí i deliberá kon pa usa konosementu sientífiko na e mihó manera p’asina haña un mihó komprondementu di e fuentenan di sushi marino. Esaki ta fasilitá mihó kolaborashon internashonal pa yega na solushonnan efektivo i tambe konsenso pa desaroyá maneho públiko pa atendé ku polushon marino i redusí esaki.