Caribbean Cetacean Society (CCS) a presentá resultadonan (preliminar) di dos aña di investigashon tokante dòlfein i bayena rondó islanan ABC. A realisá e investigashon ku koperashon i dor di amplia kapasidat den nos region. Durante un simposio na Kòrsou, resultadonan prinsipal a ser kompartí ku un grupo selekto di ‘stakeholders’, siguí pa un diskushon riba e impakto di e resultadonan pa konservashon den nos region.

Nesesidat urgente pa akshon kolektivo

E mensahe prinsipal di e simposio tabata e nesesidat urgente pa akshon kolektivo pa garantisá e sobrebibensia di e mamíferonan marino. Pa protehá e poblashonnan úniko di dòlfein i bayena den region Karibense, mester tin esfuersonan kordiná entre e islanan. E presentashon tabata dirigí pa Jeffrey Bernus, Direktor di CCS, i Stacey Mac Donald, Kordinadó Regional di CCS. E estudio akí ta representá e esfuerso mas grandi di un protokòl standardisá pa monitòr na tur tres isla ABC. Durante dos aña, CCS a organisá dos ekspedishon grandi, a trein 46 partisipante di 14 organisashon lokal. Te awor, nan a observá 47 grupo di 9 espesie diferente di dòlfein i bayena. ‘Cetaceans (walvisachtigen) ‘ ta un grupo di mamíferonan ku ta biba den awa, inkluyendo bayena i dòlfein. Nan un espesie protehá segun lei na Aruba, Kòrsou, i Boneiru.

Simposio © Caribbean Cetacean Society

E simposio tabatin representantenan di un públiko diversifiká di mas di 40 hende, inkluyendo representantenan di organisashon di konservashon manera Carmabi, STINAPA Boneiru, i DCNA, komo ‘stakeholders’ for di sektor privá i públiko. Ministerio di Salú, Naturalesa, i Medio Ambiente di Kòrsou, Javier Silvania, tabata presente, i a ekspresá ku CCS i komunidat di Kòrsou por konta riba su sosten pa avansá protekshon di mamíferonan marino i nan habitat na Kòrsou. Delegashonnan di Aruba i Boneiru tambe tabata presente, indikando e importansia di koperashon inter-insular. E investigashon akí di CCS i e simposio a ser realisá ku sosten di Wereld Natuur Fonds, SPAW RAC, Profound, i Rotary Club di Kòrsou.

Dolphin © Katjana Cabenda

Research results

E investigashon a revelá ku algun ‘bottlenose dolphins’ ta move entre e Yarari Sanctuary di Boneiru i e awanan di Kòrsou, indikando un konekshon ekológiko importante entre e islanan. CCS a deskubrí tambe ku e bayena piloto (pilot whales) ku ta biba den e awa di Boneiru ta migra na kosta di Venezuela. E resultadonan akí ta pone un énfasis riba e importansia di koperashon regional. Pa protehá e dòlfein i bayena, ta nesesario pa e islanan den Karibe traha hunto. Otro resultado importante ta e identifikashon di mas di 20 ‘sperm whales’, ku antes no a ser investigá den e region akí, i un grupo grandi (mas o ménos 150) di ‘striped dolphins’, un espesie ku CCS so a dokumentá un biaha den nan kuater aña di investigashon den Karibe. E estudio tambe ta indiká ku e tres isla lo ser usá komo un área pa brui i kria yu di diferente espesie di dòlfein i bayena, pasobra hopi sorto hubenil tantu di dòlfein komo di bayena a ser observá. Dòlfein i bayena ta protehá pa lei na Aruba, Kòrsou, i Boneiru.

Panel discussion © Caribbean Cetacean Society

Menasanan

Sinembargo, e investigashon tambe a pone lus riba e menasanan signifikante pa e mamíferonan marino. A dokumentá hopi molester, entre otro di tráfiko marino i daño físiko di ‘propeller’ i liñanan di piská, ku ta pone énfasis riba e nesesidat urgente pa medidanan di protekshon. Durante e diskushon, nan a eksplorá e impaktonan di e investigashon akí pa konservashon riba islanan ABC. Nina Zander, mènedjer di proyektonan di maneho na Dutch Caribbean Nature Alliance (DCNA), a komentá: “Mientrastantu e investigashon mester kontinuá, ya ku konosementu adishonal ta benefisial den forma medidanan, maneho, i leinan pa protehá e bestianan balioso akinan. Nos no mester warda te ora nos sa tur kos, pasobra nunka nos lo sa tur kos. Nos por kuminsá ku plannan di maneho adaptivo i tuma akshon kolektivo pa protehá e bestianan akí i nan habitat.”

Jeffrey Bernus a añadí: “Tin algun medidanan fásil ku nos por tuma awe mes. Por ehèmpel, konsiderá zonanan kaminda nos sa ku sierto dòlfein i bayena ta floresé i kaminda no tin interes den desaroyo. Esakinan nos por selektá pa protekshon awor, mientrastantu nos ta investigá ki otro medidanan ta nesesario i kon nos por implement’é mihó.” Tantu sektor privá komo públiko a indiká ku tin mester di edukashon siguí pa mas kontròl, señalando ku mas konsientisashon riba e presensia di bayena i dòlfein i e menasanan ku nan ta enfrentá na e islanan ABC ta esensial pa engrandesé nan protekshon riba e islanan.