Un di e metanan riba término largu pa Karibe Hulandes ta pa mehorá salú, biodiversidat, i resiliensia di refnan di koral pa 2030. Pa por logra e meta akí, nos ta enfoká riba tres punto di lansa.

Redusí Menasanan Kousá pa Hende Kontra e Refnan di Koral

WWF-NL ta trata na redusí e preshon riba refnan di koral den Karibe Hulandes dor di traha ku ‘stakeholdernan’ lokal. Redukshon di preshonnan lokal riba e refnan di koral ta e base di nos esfuersonan di konservashon p’e region akí. Ounke e menasanan ta hopi, nos lo enfoká riba mehorashon di e kalidat di awa. Un oumento di nutrientenan den e awa i sedimentashon dor di supstansianan den tera ku ta laba bai den laman, ta preshonnan lokal importante ku ta kousa destrukshon na refnan di koral.

Kaminda ta posibel, WWF-NL lo implementá i fasilitá proyektonan práktiko, manera yuda piskadónan mehorá sostenibilidat di práktikanan di peska, sostené gobièrnunan lokal ku implementashon di solushonnan basá riba naturalesa, i yuda implementá e prohibishonnan kontra uso di plèstik desechabel riba e islanan BES. Nos ambishon ta pa amplia e proyektonan ku aktualmente ta ser ehekutá n’e islanan BES (p.e. e proyekto di Water Circles), i implementá nan na Kòrsou, Aruba, i St. Maarten tambe. Ademas WWF-NL ta sostené desaroyo di vishonnan riba término largu i strategianan di gobièrnunan nashonal i lokal pa loke ta trata konservashon marino, ‘afvalwater’, peska, i desaroyo spasial (di kosta).

Piskadó lokal © WWF-NL / Casper Douma

Ekspandé Kobertura i Mehorá Maneho di Áreanan Marino Protehá

Nos ke mehorá konosementu di refnan krítiko di koral i e konektividat entre nan n’e islanan di Karibe Hulandes, pa boga pa mihó protekshon. Nos ke ekspandé kobertura di e Áreanan Marino Protehá kaminda ta nesesario, i mehorá maneho di e áreanan akí dor di sostené outoridatnan di parkenan, i hasi maneho di parkenan marino mas fuerte i efektivo.

Mehorá Salú di Refnan di Koral pa Medio di Restorashon Aktivo di Sierto Espesienan

WWF-NL lo promové proyektonan inovativo dor di finansiá, sostené, òf ehekutá proyektonan aktivo di restorashon di koral i espesienan asosiá (p.e. piská di ref, karkó, i seapel (‘zeeappel’)), pasobra nan ta hunga un ròl importante den tene e refnan di koral saludabel dor di kome e lima di e refnan akí.