Kampaña di Konsientisashon

Na Novèmber 2020 Boneiru Duradero a lansa e kampaña ‘Sushi òf Dushi’ pa krea mas konsientisashon pa un Boneiru mas limpi. Plèstik di un solo uso ta e kousa mayó di polushon riba e isla. Den teoria, tur hende ta na fabor di un Boneiru mas limpi, pero den práktika hende hopi biaha ta haña difísil pa stòp di usa produktonan di un solo uso, manera bakinan di kuminda.

Sushi òf Dushi Challenge ta un yamada pa akshon, enfokando riba tur habitante pa partisipá den un limpiesa ku ta dura 10 minüt i pa despues pone nan potrètnan di ANTES i DESPUES riba Instagram òf Facebook. Den transkurso di último añanan, Boneiru Duradero a organisá un kantidat di limpiesa na Boneiru, hopi biaha den kolaborashon ku Selibon, Loke ta remarkabel ta ku ora observá e hendenan ku ta partisipando na e limpiesanan aki, hopi biaha nan no ke stòp. Paso manera bo kuminsá pone atenshon…bo ta mira sushi tur kaminda. No opstante, no ta tur hende tin tempu pa partisipá den un limpiesa organisá riba un dia spesífiko na un lokalidat spesífiko.

Asina’ki Sushi òf Dushi Challenge ta diferensiá for di limpiesanan normal:
1.     Nos ta pidi solamente 10 minüt òf menos di bo tempu
2.     Bo por skohe bo mes lokalidat pa hasi limpiesa por ehèmpel: den bo mes bario, rònt di bo skol, bo trabou, òf kisas un ruta kaminda hendenan sa kana
3.     Bo potrètnan di antes i despues lo mustra tur hende e diferensia ku un limpiesa chikí por hasi den bo mes bario
4.     Bo por motivá otronan pa kontribuí na un isla mas limpi, dor di kompartí bo eksperiensia