Solushonnan basá riba naturalesa

Naturalesa ta nos aliado pa resolvé problemanan sosial manera kambio di klima. Por ehèmpel, nos tin mester di mondinan, riunan, ‘graslanden’ i oséanonan saludabel pa apsorbé CO2 i tene e klima stabil. Refnan di koral i mondinan di pal’i mangel ta protehá nos kostanan komo ‘kibra-ola’ natural kontra wer ekstremo. Áreanan saludabel di awa dushi ta esensial pa por tin sufisiente awa di bebe.

Ku e solushonnan akí, yamá solushonnan basá riba naturalesa òf solushonnan natural, nos no ta solamente kombatí kambio di klima, pero tambe nos ta reforsá e biodiversidat i nos propio kondishonnan di bida i salú. Komunidatnan lokal ta usa tipo di solushonnan similar pa problemanan sosial ya pa hopi aña kaba. Tambe ta importante pa enbolbí e poblashon lokal pa por yuda pensa i bin ku e tipo di solushonnan akí. Nan ta eksperensiá e problemanan hopi biaha di aserka, manera por ehèmpel inundashon, i nan ta ser afektá pa kambionan den nan área, manera leinan nobo òf desaroyo di proyektonan. Nos ta desaroyá inisiativanan ku un enfoke riba nesesidatnan humano i restorashon di naturalesa.

Restorashon di pal’i mangel, trabou di Mangrove Maniacs © Casper Douma

Na novèmber 2023, WWF-NL i Wageningen University & Research a lansa un rapòrt tokante solushonnan basá riba naturalesa na Boneiru. E investigashon akí ta mustra ku tin potensial na Boneiru pa usa solushonnan basá riba naturalesa kontra e konsekuensianan di kambio di klima.Ta ser premirá ku lo bai tin wer ekstremo mas frekuentemente. Pa atendé ku e senario di klima akí ta nesesario pa tin un aserkamentu integral. Kresementu nobo di e vegetashon, redukshon den kantidat di kabritu ku ta kana lòs, hasimentu di kunukunan bèrdè atrobe i tambe maneho di awa ta yuda mehorá e infiltrashon i retrasá e baimentu di awa sushi den laman.

Ademas drechamentu di roinan i zonanan di bùfer tambe ta yuda retrasá e baimentu di sushedat den laman. Mas espasio bèrdè i maneho efektivo di awa ta perkurá pa un ambiente di biba ku ta mas sigur i mas saludabel den e área urbano di Kralendijk. Ku algun kambio chikí, edifisionan tambe por ser hasí mas resistente kontra kambio di klima. Fangumentu di awa for di daknan ta redusí por ehèmpel e riesgo di inundashon i ta forma un bùfer di awa dushi pa temporada di sekura. Un otro adaptashon ta pa gradualmente eliminá berpùt i septic tanks, antó introdusí un bon sistema pa atendé ku awa di kloaka. Por lesa e rapòrt kompletu akí.

Adishonal, Dutch Caribbean Nature Alliance ta hasiendo un estudio di faktibilidat tokante restorashon di kostanan den Karibe. E meta primordial di e proyekto akí ta pa evaluá e potensial pa implementá inisiativanan pa restorá i konservá pal’i mangel i yerba di laman den nos region.