Ekspedishonnan di bayena i dòlfein

E bayena ta hunga un ròl importante den nos lucha kontra kambio di klima. E ta warda un gran kantidat di CO2 den su kurpa na momentu ku e ta na bida. Ora e muri, e ta hiba esaki na fondo di e oséano, kaminda e ta keda derá. Pupu di bayena tambe tin un influensia importante riba e C02 den atmósfera. E pupu ta alimentá phytoplanktòn; esaki ta bestianan chikitu ku ta apsorbé CO2 i ta konvertí esaki den oksígeno.

Fraser's dolphins

Dòlfeinnan © Caribbean Cetacean Society

Krese Konosementu

Mayoria di e espesienan emblemátiko manera bayena i dòlfein ta migra hopi i ta move entre nan áreanan di alimentashon i áreanan di reprodukshon durante henter aña. Pa salbaguardiá e sobrebibensia di e espesienan akí, ta importante pa protehá nan durante nan migrashonnan tambe. Miéntras e menasanan general ta konosí (p.e., nos ta trahando pa redusí e kantidat di sushi marino den Karibe), e menasanan spesífiko i na unda nan ta tuma lugá, ta deskonosí pa gran parti. Ainda tin hopi buraku grandi den konosementu tokante kon e espesienan akí ta move rònt den region, i unda nan movementunan ta topa ku e menasanan, loke ta hasi difísil pa redusí e menasanan efektivamente.

Ekspedishonnan

Ademas nos ta hasi investigashon tokante bayena i dòlfein huntu ku sientífikonan manera e tim di investigashon di Caribbean Cetacean Society, pa por protehá e animalnan mihó ainda. CCS ta organisá e ekspedishon di bayena i dòlfein yamá Ti Whale An Nou. Ti Whale An Nou ta keda finansiá parsialmente pa WWF-NL i ta parti di un programa di tres aña. Durante e último tres añanan, tur isla entre Grenada i Anguilla, inkluyendo e islanan franses, hulandes i ingles, a ser monitoriá ku un protokòl standarisá. For di 2023, e islanan ABC tambe ta inkluí den e programa regional akí.

Tim di ekspedishon © Caribbean Cetacean Society

Durante e ekspedishonnan organisá pa CCS, hendenan lokal ta ser entrená. E partisipantenan ta siña kon pa hasi investigashon sientífiko konforme un protokòl standarisá di investigashon. Esaki ta kontribuí na desaroyo di kapasidat ku ta nesesario riba e islanan pa sigurá kontinuidat lokal di e esfuersonan pa protehá nos bayena- i dòlfeinnan. E partisipantenan ta siña kon pa rekonosé e zonidonan di e bayena- i dòlfeinnan ku ta ser grabá ku un mikrofon bou di awa. Tambe nan ta siña kon pa determiná ta kua espesie nan ta enkontrá i kon pa usa kámara profeshonal pa saka portrèt di e ‘vin’ riba lomba di un dolfèin i na rabu di un bayena.

Na yanüari 2024, WWF-NL a kuminsá duna sosten na fundashon Blue Defenders. E fundashon akí lo organisá su promé ekspedishonnan den awanan di Boneiru pa opservá bayena, dòlfein, tribon i raya.

Historia di refnan

Deskubrí nos eksposishon >