Conquer the Future

Karkó (Aliger gigas) tabata hopi komun den e bahianan di Karibe. Na lugánan manera Lac Baai, tabatin hopi karkó. Debí na hopi peska i pèrdida di hábitat, karkó awor ta un espesie na peliger rònt Karibe. E proyekto ‘Conquer the Future’ su meta ta pa reforsá e poblashon natural di karkó dor di pone den laman karkónan hóben ku a ser kriá. E kwekerij The Queen Conch Hatchery na Curaçao Sea Aquarium ta kria e karkónan akí.

Karkó hubenil ku un tag

Nos ta pone kantidat chikitu di karkó hóben den laman, den yerba di laman.Yerba di laman ta e mihó ambiente pa e slaknan akí biba aden. Karkó ta kome alga (lima) chikitu i otro organismonan ku ta biba den e yerba, loke ta tene e yerba di laman saludabel. Karkónan hóben en partikular, ta kome material orgániko morto además di alga chikitu, pues asina nan ta limpiadónan chikí masha útil! Yerba di laman ta kapturá CO2 te ku 35 biaha mas lihé ku e selvanan tropikal! P’e motibu ei, nos mester mantené un poblashon salú di karkó pa tene e siklo natural di e yerba di laman den balansa.

Midi i monitòr e karkó ku tag

Tags ku transmisornan ta ser poné riba nan pa monitoriá nan kresementu i sobrebibensia. Ora nos haña mas komprondementu, nos por pone mas karkó pa reforsá e poblashon. Pa logra nos metanan, nos ta kolaborá ku piskadónan lokal, representá pa e kooperativanan PISKABON na Boneiru i FKUP na Kòrsou. E proyekto ta finansiá pa WWF-NL i Seacology, i ta ser realisá bou di supervishon di STINAPA.

STINAPA, FKUP, PISKABON i WWF-NL a firma un akuerdo pa traha huntu riba e repoblashon di piská i e implementashon di práktinanan di peskeria sostenibel