Polushon di plèstik ta un problema mundial i tin un esfuerso global pa redusí plèstik di un solo uso dor di prohibí produktonan manera saku di plèstik, richi i bakinan di kuminda di foam. E gobièrnu lokal di Boneiru ta trahando aktivamente riba e implementashon di e prohibishon. E prohibishon aki lo impaktá negoshinan lokal, residentenan i turistanan. Pesei e inisiativa di WWF-NL Boneiru Duradero a lansa un programa edukativo online pòrnada ku yama Beyond Plastics.

E programa online a keda desaroyá den koperashon ku konsehero ambiental Travel Without Plastic. E ta krea e oportunidat pa tur hende na Boneiru siña dikon nos mester redusí plèstik di un solo uso i kon nos por logra un redukshon di plèstik signikativo.

Un kantidat di módulo den e programa edukativo online Beyond Plastics, ta diseñá spesífikamente pa hotèlnan, akomodashonnan i ekskurshonnan. E módulonan aki ta ofresé dos rekurso práktiko (ku por download) ku negoshinan por usa:
1.  E intrumento di evaluashon propio ta fasilitá e hotèlnan pa katalogá e tipo di plèstik di un solo uso ku nan ta usando. Hasiendo inventario tambe ta yuda pa ta mas konsiente di e montante di ‘plèstik ku ta ser tirá afó’ i ku ta ser usá pa aña.
2.  E  tabla di rekomendashon ta duna konsehonan práktiko pa kuminsá ku redukshon di plèstik mesora i kisas asta spar sen dor di tuma desishonnan mas mihó.

Ademas, tin un módulo di komunikashon disponibel ku ta yuda empresarionan desaroyá nan propio strategia di komunikashon pa plèstik di un solo uso. Beyond Plastics tambe ta inkluí módulonan pa eduká e públiko en general, splikando e impakto ku plèstik di un solo uso tin riba nos naturalesa i nos salú. E programa edukativo online ta fásil pa usa i no tin hopi kos pa lesa. Pasobra ku un simpel klek bo por skucha e naradó na Papiamentu òf na Ingles.

E módulonan ku ta fásil pa sigui i ku ta dura 10 minüt, por yuda tur hende, di muchanan di skol te welanan pa nan kompronde dikon ta asina importante pa un isla chikí manera Boneiru redusí plèstik di un solo uso.