WWF-NL ta sostené RoffaReefs di Diergaarde Blijdorp

Loke un tempu a kuminsá komo eksperimento den e Oceanium di Diergaarde Blijdorp na Rotterdam, a krese i bira RoffaReefs na Boneiru. Un organisashon ku ta dediká su mes na salba e koral dor di kria piská. E método a resultá asina eksitoso ku ta nesesario pa pasa pa un eskala mas grandi. Komo partner di promé ora, Diergaarde Blijdorp awor a inkluí RoffaReefs definitivamente den su hub Karibense. Wereld Natuur Fonds (WWF-NL) ta hopi kontentu ku e desaroyo akí.

 

Meskos ku Diergaarde Blijdorp, WWF-NL tambe tin laso estrecho ku RoffaReefs. Ku un malesa serio di koral ku ta sigui plama den Karibe i otro áreanan, e téknika di RoffaReefs ta mas relevante i urgente ku nunka. Despues di e resultadonan prometedor di fundadó Sander van Lopik i su ekipo, WWF-NL a disidí na yuda e start up akí na 2022. WWF-NL i Diergaarde Blijdorp ta masha bon partner pa basta tempu kaba, loke ta hasi e situashon akí ainda mas bunita, kaminda e ambishonnan separá awor ta uni den e hub ultramarino akí di e parke di bestia di Rotterdam. For di e hub na Boneiru, Diergaarde Blijdorp lo realisá i sostené proyektonan lokal i regional di konservashon di naturalesa. Ku e bishita di direktor di Blijdorp Erik Zevenbergen, no solamente e lasonan ta keda reforsá, pero ademas ta ser intensifiká.

Instalashon di e sistema di kria piská © WWF-NL / Casper Douma

Kiko RoffaReefs ta hasi?

Fundadó di RoffaReefs, Sander van Lopik, a mira basta aña pasá ku mundialmente no ta bayendo bon ku e koralnan. Enbes di kria i plantá koral, el a disidí na investigá un otro solushon pa e problema. Koral ta un organismo bibu ku ta dependé di piskánan ku ta manten’é. Manera e famoso doktersvis. Dor di dékadanan di sobrepeska, kambio di klima i polushon, awor na hopi lugá rònt mundu tin ménos piská pa mantené e refnan di koral i laga nan floresé. Ku tur konsekuensia ku esaki ta trese kuné.

Webu di piská bou di mikroskop © WWF-NL / Casper Douma

Barera indispensabel

Na Rotterdam, RoffaReefs a desaroyá un método pa kapturá i kria webu di piská i pone esakinan bèk den e koral. Despues di basta aña di tèstmentu den e ambiente kontrolá di un akuario, RoffaReefs a tribi tuma e paso pa bai Boneiru. Einan a resultá despues di hopi eksperimentashon, ku e téknika ta aplikabel tambe den laman grandi. Danki na yudansa di e kooperativa lokal di peska Piskabon, organisashonnan di naturalesa manera STINAPA, Dutch Caribbean Nature Alliance (DCNA) i tambe WWF-NL, RoffaReefs por a perfekshoná e método i asina logra e promé resultadonan importante. E speransa i ekspektativa ta ku pa medio di e esfuersonan kombiná, mas organisashon lo uni nan mes na e proyekto prometedor i importante akí. Pasobra koral ku ta saludabel ta forma un barera natural i indispensabel kontra e subida di nivel di laman, ku ta un menasa grandi i real pa hopi isla.