Un inisiativa nobo ku ta yama proyekto di ReefGrazers lo kuminsá na sèptèmber, ku e meta di restourá refnan di koral den Karibe i pa apoyá práktikanan di peska sostenibel. E proyekto akí ta tuma lugá na Boneiru, St. Eustatius i Saba, den kolaborashon ku diferente partner, inkluyendo universidatnan i organisashonnan lokal di maneho di naturalesa.

Kolaborashon pa konservashon di naturalesa

E proyekto ReefGrazers ta un kolaborashon entre Van Hall Larenstein University of Applied Sciences, Wageningen University, Wageningen Marine Research, the Public Entity Saba, STINAPA Bonaire, STENAPA, Saba Conservation Foundation i WWF-NL. E kolaborashon akí a ser desaroyá pa kontribuí na e konservashon di koralnan Karibense, ku for di dekada di 70 a sufri dañonan grave komo resultado di kambio di klima, orkan, malesanan i polushon. E faktoranan akí a lanta un kresementu masivo di alganan, ku ta hasi difísil pa koralnan por rekonstruí. E rason prinsipal pa e kresementu di alganan ta falta di bestianan ku ta kome alga. Sobrepeska i malesanan a redusí e kantidat di bestianan ku ta kome alga.

Investigadó ta pone seapel blanku riba un ref artifisial. E ref ta den un kouchi pa midi kua impakto e bestia tin riba e alga. © Alwin Hylkema

Oumento di bestianan ku ta kome alga

Refnan salú, dominá pa koral en bes di alga, ta di gran importansia pasó nan ta protehá kosta, sostené peskeria i atraé turista. Tur e kosnan akí ta esensial pa e ekonomia i kultura den Karibe. E proyekto ReefGrazers ta enfoká riba e uso di bestianan nativo ku ta kome algu, manera e kangreu ‘Caribische koningskrab’, seapel blanku, kiwa, pa kontrolá e kresementu di alga. E proyekto lo investigá e poblashon aktualmente di e animalnan aki, evaluá nan impakto riba e refnan i investigá e éksito di esfuersonan pa oumentá nan kantidat.

Peska sostenibel

Ademas, lo analisá práktikanan lokal di peska i eksplorá posibilidatnan pa peska sostenibel basá riba e oumento di animalnan. Esaki ta duna oportunidat nobo pa peskeria chikí. E proyekto akí ta importante, no solamente pa Boneiru, St. Eustatius i Saba, pero por fungi komo modelo di restourashon pa refnan di koral na e otro islanan den Karibe.