WWF-NL i su partnernan ta preokupá pa futuro di naturalesa riba islanan BES. Segun e rapòrt State of Nature 2024, naturalesa den e region aki ta den un estado malu. Pa kombatí esaki, WWF-NL i su partnernan ta pidi gobièrnu Hulandes pa pone mínimo €300 mion disponibel pa protehá i restourá naturalesa i pa mehorá e infrastruktura medioambiental.

Responsabilidat
Ministerio di Agrikultura, Peska, Seguridat di Kuminda i Naturalesa (LVVN) ta responsabel pa e maneho di naturalesa na Boneiru, Saba i St. Eustatius. E plan NEPP (Nature and Environmental Policy Plan Caribbean Netherlands 2020–2030) ta deskribí e tareanan aki. Basá riba eksperensia lokal i di ekspertonan, WWF-NL ta kalkulá ku tin mester di un suma adishonal di €300 mion pa e implementashon di e plan te aña 2030. €150 mion ta nesesario pa konservashon i restourashon di naturalesa. €150 mion ta esensial pa mehorá infrastruktura medioambiental, manera solushonnan pa manehá awa sushi. Te ku aworaki, no tin finansiamentu garantisá pa e periodo di 2025 te 2030.

Preokupashon kolektivo
Den un deklarashon konhunto, algun organisashon di naturalesa riba e islanan BES a indiká ku e ekosistema di e islanan ta krítiko. Sin sosten finansiero struktural i urgente, nos ta riska dañonan ku no por bira drecha mas na refnan di koral, palunan di mangel i habitatnan riba tera. Esaki ta pone biodiversidat, seguridat di kuminda, resilensia klimátiko i ekonomia lokal na peliger. Hulanda mester tuma su responsabilidat i inkluí konservashon di naturalesa riba e islanan den su presupuesto nashonal, meskos ku e ta hasi pa Hulanda.

Ménos naturalesa, ménos entrada
E rapòrt State of Nature 2024 ta mustra ku biodiversidat den Karibe Hulandes ta bou di preshon fuerte. Investigashon di Wageningen Marine Research i Wageningen Environmental Research a identifiká tres menasa prinsipal: ‘loslopend vee’, animalnan invasivo i kambio di klima. Pa refnan di koral tin adishonalmente menasanan manera polushon pa motibu di falta di tratamentu di awa sushi, malesanan i preshon di peska. Si nos pèrdè biodiversidat, nos tambe ta pèrdè e benefisio ku naturalesa ta duna nos. Na 2013, balor di esaki a keda kalkulá na 31% (Boneiru), 63% (Saba), i 24% (St. Eustatius) di e ekonomia total di e islanan (GDP).

Proyektonan eksitoso
Apesar di e retonan, tin vários proyekto di konservashon ku a logra bon resultadonan den e promé fase di implementashon di NEPP. Segun e rapòrt State of Nature 2024, a logra bon resultado ku eliminashon di ‘loslopend vee’, pushinan den mondi i iguananan invasivo. Mester sigui i ekspandé e proyektonan. Ku fondonan di gobièrnu Hulandes, organisashon lokal a logra protehá espesie manera turtuga, tribon (tiger shark), selva tropikal i refnan di koral. Ainda no ta lat pa protehá naturalesa riba e islanan BES, pero finansiamentu struktural ta nesesario pa evitá ku estado di naturalesa ta bira pió i pa sigui ku e desaroyonan positivo.