Naturalesa Karibense den spòtlait
E naturalesa bunita i úniko di e seis isla den Karibe Hulandes lo ta e aktor prinsipal den e pelíkula WOW! Caribbean Nature Uncovered, ku lo ser presentá den sine. E proyekto akí ta trese diferente partner hunto, inkluyendo WWF-NL i Dutch Caribbean Nature Alliance (DCNA). E meta ta pa inspirá i motivá e públiko pa protehá naturalesa, ku un enfoke riba e vulnerabilidat i e resiliensia di e ekosistemanan spesial akí.
Hunto pa protehá naturalesa
WWF-NL ta dediká pa mas naturalesa via protekshon i restourashon di naturalesa rònt mundo, tambe riba e islanan Karibense Hulandes. E islanan akí tin rònt di nan refnan di koral i palunan di mangel i espesie marino ikóniko manera bayena, dòlfein, tribon i turtuga, kual ta naturalesa spesial. I e naturalesa akí ta kontribuí na kuminda i entrada di e habitantenan i na felisidat di bishitantenan ku e islanan ta risibí regular. WWF-NL ta traha riba e islanan huntu ku habitantenan i partnernan lokal pa protehá i restourá e naturalesa regional. E programa di Karibe Hulandes di WWF-NL ta prinsipalmente enfoká riba ekosistemanan na kosta i animalnan marino ikóniko.
Grupo di piská © WOW! / EMS FILMS
Konsientisashon
Aparte di protehá espesienan i áreanan, edukashon i konsientisashon tambe ta un parti importante den e programa. P’esei WWF-NL ta traha hunto ku partner lokal DCNA pa desaroyá proyekto di edukashon pa hóben riba e seis isla. E kolaborashon ku WOW! Caribbean Nature Uncovered ta un paso bunita den e mishon pa protekshon di naturalesa, kaminda naturalesa di e islanan Karibense ta risibí e atenshon ku e meresé. E islanan akí ta karga un biodiversidat riku ku hopi biaha no ta ser apresia òf hasta ignorá. Via un pelíkula úniko, e produktornan ke pa tur hende por disfrutá di naturalesa di e islanan i stimulá e kuido kompartí pa e naturalesa akí.
Proyekto di multimedia
WOW! Caribbean Nature Uncovered ta un proyekto ambisioso di multimedia inisiá pa e fundashon 360º of Innovation for di Aruba i MN Media Group for di Hulanda. WOW! ta bai mas leu ku solamente un pelíkula den sine. Aparte di e pelíkula, nan lo traha 6 dokumental mas. Tambe lo tin un podcast, un plataforma di edukashon i un database. Talento lokal riba e islanan lo haña e oportunidat pa partisipá den e proyekto, kual ta un tremendo oportunidat pa e talentonan i e ta duna e proyekto e input lokal nesesario.
Konekshon
Arno Verhoeven, direktor di DCNA: “Pa mustra kon naturalesa ta un parti integral di bida riba e islanan, e pelíkula ta toka e kurason, emoshon i alma di hende. Ta e mishon di e produktornan i e partnernan pa mustra e bunitesa di e islanan Karibense i di asina krea un moveshon mundial pa konservá e ekosistema úniko akí.”
Bianca Peters, co-produktor di WOW!: “Tur dia e bunitesa i vulnerabilidat di naturalesa riba e islanan ta toka mi profundo. Ta manera mi ta deskubrí algu nobo tur bes den e biodiversidat riku ku e islanan tin pa ofresé. Ku WOW! nos ke mustra no solamente e naturalesa impaktante, pero tambi krea un konekshon emoshonal entre e islanan i e Reinu Hulandes komo un totalidat. Si nos ta mas sinsero, kuantu hende na Hulanda konosé e islanan i e naturalesa riku riba e islanan di bèrdat?
Mi ta kere ku si nos por kompartí e amor pa nos naturalesa, nos por krea un konekshon potente riba hopi tema den nos sosiedat. Ta nos mishon pa ku e pelíkula, e dokumentalnan, e podcast, e plataforma di edukashon, e programa di talento i e database, nos por krea un apresio i responsabilidat kompartí pa nos medioambiente, pa generashonnan futuro tambe por ta impreshoná meskos ku nos. Mi ta sumamente agradesido ku nos ta traha hunto ku WWF-NL i DCNA riba e proyekto akí. Solamente hunto nos por hasi e diferensia.”
