Konosementu prometedor tokante bayena i dòlfein pero mas investigashon ta nesesario

Caribbean Cetacean Society (CCS) ta wak bèk ku satisfakshon riba e promé ekspedishon Ti Whale An Nou na e islanan ABC. Den luna di òktober, CCS a hasi investigashon sientífiko tokante e diversidat, distribushon i patronchinan di move di bayena i dòlfein, i tambe a analisá e menasanan ku nan ta enfrentá den e region akí. Durante e 20 dianan di investigashon a monitoriá 8 espesie, inkluyendo e sperm whale chikí, orka chikí, pilot whale, sperm whale i hopi espesie di dòlfein. E presensia di un kantidat grandi di bayena i dòlfein hóben, i e sikatrisnan ku a ser opservá serka hopi adulto durante mayoria enkuentro, ta suprayá e importansia di e inisiativa akí i e nesesidat di akshon lokal pa ku konservashon.

Resultadonan positivo

E awanan di kada isla, Aruba, Boneiru i Kòrsou a ser investigá durante un siman. E kondishon di tempu no tabata semper ideal pa opservashon. Apesar di esaki, e tripulashon di CCS i boluntarionan a logra opservá e espesienan di dòlfein Spinner, Pantropical spotted, bottle nose i Atlantic spotted, i tambe e espesienan di bayena konosí komo sperm whale, pilot whale i sperm whale chikí. E sperm whale chikí a ser opservá tres biaha, loke ta rekerí atenshon spesial, pasobra e espesie akí ta esun mas sensitivo pa polushon di zonido. Tambe a mira hopi dòlfein hóben. Esaki ta enfatisá e nesesidat di protehá e áreanan di ‘kwekerij’ akí, ku ta vital pa protekshon di e espesienan. “Nos ta kontentu ku e resultadonan, pero ta mas ku kla ku tin mester di mas investigashon pa haña sa mas tokante e mamíferonan marino akí. Esaki ta mustra tambe riba e importansia di ekspandé e Yarari Sanctuary pa inkluí e awanan di Kòrsou i Aruba”, asina Direktor di CCS, Jeffrey Bernus, a bisa.

Sakando portrèt di dòlfein © Caribbean Cetacean Society

Kapasidat lokal

Un total di 25 persona di e islanan a ser entrená pa Jeffrey i Stacey Mac Donald, kende ta Program Advisor di e programa di WWF-NL pa Karibe Hulandes. Esaki ta kontribuí na kapasitashon ku ta nesesario riba e islanan pa sigurá kontinuidat lokal di esfuersonan pa protehá nos bayenanan i dòlfeinnan. E partisipantenan tabata konsistí di personanan ku ta traha maneho, konservashonistanan, representantenan di STINAPA Boneiru, piskadónan, nabegantenan, un studiante di biologia marino i otronan ku tin algun konosementu i amor pa laman. E partisipantenan a siña kon pa rekonosé e zonidonan di e dòlfeinnan i bayenanan, ku a ser grabá ku un mikrófono bou di awa. Tambe nan a siña kon pa determiná kua espesie nan a enkontrá i kon pa usa kámaranan profeshonal pa saka portrèt di e ‘rugvin’ di e dòlfeinnan i e rabu di e bayenanan (kual ta nan ‘vingerprint’) for di un distansia safe di 300 meter i pa aserká nan kuidadosamente sin krusa riba nan kaminda. Esaki ta duna nos informashon tokante movementu di e diferente dòlfein- i bayenanan entre e islanan.

Kolaborashon

Na Boneiru e setáseonan (‘walvisachtigen’) ta protehá legalmente den e Yarari Sanctuary. STINAPA Boneiru i Ministerio di Salú, Medio Ambiente i Naturalesa di Kòrsou a duna sosten na e ekspedishon sientífiko akí. E investigashon a tuma lugá den akuerdo ku Aruba Marine Mammal Foundation i Aruba National Park Foundation. Setáseonan ta un espesie protehá segun leinan di Aruba i no ta pèrmití pa perturbá nan. E ekspedishon na ABC a ser organisá na honor di Paul Hoetjes, kende a hasi trabou ekstenso riba tereno di konservashon di naturalesa den Karibe. E tabata un di e inspirashonnan pa funda di CCS. Ti Whale An Nou ta ser finansiá pa WWF-NL i ta parti di un programa di tres aña.

Un par di e CCS miembronan i boluntarionan © Caribbean Cetacean Society

 

Historia di refnan

Deskubrí nos eksposishon >