Varios organisashonnan den Karibe Hulandes i su partnernan a partisipásrecientemente na e di 77 konferensia anual di Gulf and Caribbean Fisheries Institute (GCFI), ku a tuma lugá di 4 te ku 8 di novèmber. E evento akí a ofresé un oportunidat balioso pa organisashonnan kompartí konosementu, diskutí retonan kompartí, i buska solushon pa protehá bida den laman den e área Gulf and Caribbean.

Kolaborashon pa un laman sano

E tema di e konferensia di e aña akí, “Ekosistema Marítimo Bou Preshon: Redukshon, Reforsamentu, i Rekonsiliashon pa Mehorá Kalidat di Bida,” a duna e base pa diskushonnan. Diferente seshonan i tayer a eksplorá sostenibilidat, piská i bida den laman, peska, i inovashonnan den maneho marítimo. Representantenan di Wereld Natuur Fonds (WWF-NL), Caribbean Cetacean Society, Diergaarde Blijdorp, Piskabon, Dutch Caribbean Nature Alliance, STINAPA i Federashon Kooperativanan Uní di Produkshon (FKUP) tabata presente. Traha huntu den Karibe ta esensial pa protehá bida marino. Hunto organisashonnan i komunidatnan por kompartí ideanan i krea maneranan mihó pa mantené laman saludabel, yudando tanto naturalesa komo ekonomianan lokal.

Bayena i dòlfein

Un seshon spesial ku e título “Marine Megafauna Guiding the Way to Improved Ocean Management” tabata un di e momentonan klave di e konferensia. Finansiá pa WWF-NL i Agoa Sanctuary – French Biodiversity Agency, e seshon akí a ser organisá den kolaborashon ku Caribbean Cetacean Society i otro organisashonnan. E oradónan a kompartí investigashonnan resiente i trabou di konservá animalnan grandi ku ta biba den laman i nan ruta di migrashon konosí komo Blue Corridors, den Mar Karibense i e Gòlf di Mexico. Monique de Water, Program Manager di WWF-NL pa su programa pa Karibe Hulandes, a splika e importansia di protehá e rutanan di bayena. Jeffrey Bernus, direktor di Caribbean Cetacean Society, a presentá resultadonan di monitòr di bayena i dòlfein ku ta enfatisá e nesesidat di esfuersonan kordiná pa konservá laman.

Jeffrey Bernus ta duna un presentashon durante e seshon spesial.

Interkambio di konosementu ku piskadó

Un otro presentashon informativo a bini di RoffaReefs, un programa di Diergaarde Blijdopr, i Piskabon, ku a kompartí resultado di un tayer konhuntu ku piskadónan lokal na Boneiru. Kombinando konosementu tradishonal di piskadónan ku método siéntifiko, nan a desaroyá aplikashonnan práktiko pa kria piská rònt di rifnan di koral. Sander van Lopik, fundadó di RoffaReefs, hunto ku miembronan di direktiva di Piskabon, a presentá nan proyekto di kolaborashon, mustrando kon konosementu di piskadónan ta integrá den maneho di Piskabon i e sistema di kria piská di RoffaReefs.

Piskadó pa semper

E konferensia di GCFI tambe a inkluí CINEFISH, un festival di pelíkula ku tabata presentá pelíkulanan kòrtiku tokante peska, ekosistema marítimo tropikal i konservashon di laman. Durante CINEFISH, un vershon kòrtikudi e dokumental “Piskadó pa semper” a wòrdu transmití, ku ta ilustrá e pashon i retonan di piskadónan di Boneiru. E pelíkula akí ta mustra e luchanan pa forma e koperativa Piskabon i nan esfuersonan kontinuo pa preservá nan trabou pa generashonnan futuro.

RoffaReefs, un programa di Diergaarde Blijdorp, i Piskabon ta presentá nan resultadónan di kolaborashon.