Un ekspedishon sientífiko pa studia bayenanan den Bahia di Samaná, Banko di Navidad i Banko di Plata den Repúblika Dominikana Una duna hopi prueba ku e region aki ta sirbi komo un área importante pa bayenanan traha i kria yu. Esaki ta e promé biaha den mas ku 30 aña ku investigadónan a hasi un estudio koordiná pa studia bayena di e espesie ‘bultruggen’den e region aki.

Mas bayena ku a spera
Caribbean Cetacean Society (CCS) a organisá e ekspedishonnan den kolaborashon ku WWF, Blue Marine Foundation, Ministerio di Medio Ambiente di Repúblika Dominikano, CEBSE, FUNDEMAR, Fondo Marena, Ecobahia, Heol Expedition i Starvoiles. Entre mitar di febrüari i mitar di mart 2025, investigadónan di CCS a hasi investigashon den Bahia di Samaná, kaminda nan a konta bayenanan i dokumentá nan komportashon. E resultado ta mustra ku mas bayena ta usa e bahia ku loke a wòrdu pensa promé, ku un volumen averahe di un bayena pa kada tres ‘vierkante’ kilometer. Durante e ekspedishon tabatin entre 60 i 140 bayena den bahia na mesun ora, kual ta un kantidat impreshonante. E ta un oumento kompará ku investigashon di aña 1980 i 1990, i ta konfirmá ku Samaná ainda ta un di e lugánan mas importante pa ‘bultruggen’ den Karibe.

Mama ku yu © Caribbean Cetacean Society

Área pa kria yu
Sientífikonan a mira mama ku yu, bayenanan adulto i soltero i gruponan maskulino ku ta kompetí entre nan mes. Esaki ta fortalesé ku Bahia di Samaná ta sirbi komo un ‘kraamkamer’: un área pa nan traha i kria yu. Despues di e trabou den Samaná, e tim a bai Banko di Navidad na norte di Repúblika Dominikano, kaminda nan a hasi un investigashon piloto ku método visual i akustiko. E resultado tabatin mas impakto: 321 opservashon den apenas 2 dia. Na sierto momentu probablemente tabatin mas ku 100 bayena presente den e zona.

Pa promé biaha: mama ku yu na Banko di Navidad
Pa e promé biaha, investigadónan a mira mama ku yu na Banko di Navidad. Loke ta ekstraordinario, pasobra antes tawata kere ku e lugar aki no tin sufisiente protekshon di ref pa kria yu. E deskubrimentu aki ta laga mira ku e medida di protekshon mester wòrdu aktualisá. E investigashon ta yega na un momentu kritiko. Aunke poblashon di ‘bultruggen’a logra rekonstruí den hopi parti di mundu, e bestianan ainda ta enfrenta ku menasanan ku ta sigui krese: turismo, tráfiko marino, molèster di zonido bou di awa i kambio di klima. Tur esaki por stroba nan komportashon natural, mas tantu den temporada di traha i kria yu den su promé fase.

Opservashon durante e ekspedishon © Caribbean Cetacean Society

Yamada pa protekshon renobá
Durante e ekspedishon, investigadónan a mira hopi tipo di komportashon di bayenanan: machunan ku ta kanta, individuonan, gruponan di machu, i yunan ku ta imitá nan mam manera bula i bati ku rabu. Esaki ta indiká ku Samaná i Banko di Navidad no ta solamente un ‘kraamkamer’, pero tambe un skol di bida, kaminda e yunan ta siña abildatnan pa sobrebibí.

Lastimamente e tim di CCS tambe a mira mòlester humano. Vários bes botonan ku e meta pa mira bayena, a yega demasiado serka di e yunan apenas algun meter di distansia, loke ta hopi peligroso/ Esaki ta mustra ku ta nesesario pa regulá turismo mihó. Turismo responsabel por yuda e bestianan i no hasi daño.

E ekspedishon di CCS a yega ku dato siéntífiko balioso pa yuda mehorá e maneho di turismo i tráfiko marino den e region, ku e meta pa duna e bestianan un futuro mas seguro.