Den un gran paso pa protekshon di laman, WWF i un koalishon global di sientífikonan, organisashonnan sosiasl, gobièrnunan i inovadónan teknológiko a lansá BlueCorridors.org. Esaki ta un plataforma digital nobo ku ta pone riba mapa e rutanan di migrashon di bayenanan, hunto ku e peligernan ku nan ta enfrentá i solushonnan pa yuda protehá nan. Pa e promé biaha, e “blue corridors” – e rutanan ku bayenanan ta sigui den laman – riba un mapa digital i habrí pa publiko pa yuda siensia, polítika i esfuersonan di protekshon marino.

Investigashon pa protekshon di bayena
E plataforma ta reuní mas ku 30 aña di dato di siguiemento via satelit, danki na mas ku 50 grupo di investigashon na mundu, inkluyendo Oregon State University, University of California Santa Cruz i University of Southampton. E mapanan ta mustra e rutanan ku bayenanan ta usa pa bai entre lugánan pa kome, reprodusí i bida sosial. E rutanan ta esensial pa nan mes, pero tambe pa e salú di laman.

Pero e kaminda vitalnan aki ta den peliger. Aunke tin hopi aña di trabou di konservashon, 7 di 14 espesie grandi di bayena ta keda na peliger òf nan ta vulnerabel. Aksidente ku boto, pegamentu den material pa piska, zonido den laman, polushon di plèstik i efektonan di kambio di klima ku ta pone nan bida na riesgo.

Imahen di e plataforma BlueCorridors.org © 2025 Protecting Blue Corridors project and partners

Kombiná siensia ku solushon práktiko
BlueCorridors.org ta un solushon práktiko. E ta un hermènt interaktivo i fásil di usa ku ta pone riba mapa moveshonnan di bayenanan, peligernan di nan medio ambiente, i zonanan esensial pa konservashon. E plataforma ta yuda ekspertonan i hende influensial pa traha huntu, sin mira frontera, pa protehá e animalnan grandi aki di laman.

“Blue corridors ta hopi mas ku solamente un ruta di migrashon – nan ta ‘lifelines’ pa bayenanan i e ekosistemanan ku nan ta sostené,” segun Chris Johnson, lidèr global di e Inisiativa di WWF pa Protehá Bayena i Dòlfein. “E plataforma aki ta kambia dekadanan di siensia den akshon – mustrando ki ora, unda i kon nos por protehá bayenanan den un laman ku ta kambia rapidamente.”

Karakaterístikanan prinsipal di e plataforma

• Mapanan di migrashon di bayena pa espesie i temporada, ku por download i kompartí;
• Mapanan di protekshon, inkluyendo datonan di Important Marine Mammal Areas (IMMAs) di IUCN;
• Peligernan manera rutanan di boto, zonanan di pesca i impaktonan klimátiko;
• Ehèmpelnanan real ku ta mustra unda bayenanan ta mas vulnerabel i kiko gobièrnu por hasi.

BlueCorridors.org ta e resultado pa e nesesidat ku ta sigui krese pa metodonan habrí, basá riba siensia, pa konektá i protehá bida marino na un nivel global. Publikashonnan ku ta splika e método i diseño kolaborativo problablemente lo sali na final di 2025.

Bayenanan di e espesie ‘Humpback’ © Darren Jew