Sosten pa enfoke riba Blue Corridors pa e Region Amplio di Karibe

WWF-NL den kolaborashon ku Reino Hulandes, gobièrnu di Fransia, sekretariado di SPAW i SPAW RAC i Agoa Sanctuary, a duna un presentashon tokante Blue Corridors pa e Region Amplio di Karibe. Durante e Konferensia di Partidonan (KdP) pa e Kombenio di Cartagena, e partnernan a ilustrá kon e enfoke akí por sostené e protekshon di rutanan di migrashon di bayena i dòlfein den e region akí.

 

Bayenanan por biaha distansianan enorme ora nan ta migra entre nan hábitatnan den oséano. E rutanan di migrashon akí ku ta konektá ku otro, ta ser yamá superhighways di bayena òf Blue Corridors. Na febrüari 2022, WWF i partnernan sientífiko a publiká un rapòrt mundial titulá ‘Protehando Blue Corridors’. E rapòrt akí ta duna un bista di e hábitatnan krítiko den oséano ku ta konfrontá un variedat di menasa prosedente di aktividatnan humano, i ta asentuá solushonnan pa protehá e Blue Corridors. Durante e konferensia, WWF-NL i su partnernan a urgi pa tin un kolaborashon regional entre investigadónan, komunidatnan lokal, industria i gobièrnunan pa e Region Amplio di Karibe.

Nan meta ta pa sostené e trahamentu di mapa di e superhighways di bayena i di e hábitatnan krítiko den un rapòrt yamá ‘Blue Corridors pa e Region Amplio di Karibe’. Nan ke logra esaki dor di pone disponibel tur dato tokante e espesienan akí pa alkansá e propósito akí. Organisashonnan i individuonan por mustra nan sosten pa e inisiativa akí dor di firma un formulario di kompromiso via e webpage akí. WWF-NL i su partnernan aktualmente ta ekspandiendo nan nètwèrk komo un promé paso pa ku e kolaborashon regional akí.

E petishon akí pa kolaborashon a ser enfatisá tambe pa Minister di LNV, Christianne van der Wal, durante e evento ministerial di haltu nivel di e KdP di Cartagena. Den su diskurso, el a bisa: “Gobièrnunan no por logra metanan nan so. E yabi lo ta pa traha huntu i tene kuenta ku e diferente nesesidatnan i retonan.”

Mas ku un tersera parti di tur espesie di bayena i dòlfein ta ser hañá den Karibe. Bayenanan ta kontribuí na oséanonan saludabel, refnan di koral resiliente i tambe turismo. Tin evidensia kresiente ku ta mustra tambe ku bayenanan ta hunga un papel den mantenshon di nos klima mundial. Áreanan protehá por brinda un refugio pa bayena i dòlfein. Pero ora nan ta biaha for di un área (protehá) pa un otro área pa kome, forma pareha, duna lus, kria nan yunan òf sosialisá, nan ta kore riesgo di keda pegá den entre otro redanan di peska i tambe kore riesgo di enkontrá zonido duru bou di awa kousá pa eksplorashon di petróleo i gas, riesgo di dal den barku, i mas.

Nos ta sostené i ta kontentu di mira ku e Tribon-Bayena, Manta Gigante, Tribon Oseániko di Ala Blanku i Yuana di Antias Menor awor tin e status di Anekso II di e Protokòl di SPAW. Esaki ta nifiká ku ta prohíbí pa lei pa hasi komèrsio ku e animalnan akí òf perturbá nan.

Tur Gutu i Tribon di Ref di Karibe ta inkluí den Anekso III. Ta permití pa kapturá e animalnan akí, pero tin reglanan pa sigurá ku e poblashon ta keda balansá. WWF ta aplaudí tambe e adopshon di e Plan di Akshon aktualisá pa Konservashon di Mamíferonan Marino den Karibe.