Organisashonnan lokal i regional di naturalesa ta uni forsa pa desaroyá un Plan di Akshon pa Rekuperashon di Turtuga (STRAP) pa Karibe Hulandes. Komu preparashon pa e plan di akshon pa protehá turtuga Karibense, un tayer a ser organisá pa Sea Turtle Conservation Bonaire (STCB) i Wereld Natuur Fonds durante e konferensia anual di WIDECAST.

E organisashonnan envolví den konservashon i rekuperashon di turtuga den Karibe Hulandes a ser invitá pa e tayer aki. E meta di e tayer ta pa diskutí e status aktual di aktividatnan i amenas den e region i pa determiná e kontenido di e plan. Tambe ta kuminsá identifiká prioridatnan ku ta nesesario pa aumentá e protekshon di turtuga riba kada isla. E STRAP pa Karibe Hulandes ta un proyekto finansiá pa Ministerio di Agrikultura, Naturalesa i Kalidat di Kumidna i WWF-NL, i ta ser implementá pa STCB en kolaborashon ku WWF-NL.

Representantenan di diferente organisashon ta uni pa STRAP

Manera otro espesie migratorio, turtuga no tin fronteranan. Nan bienestar i protekshon ta dependé di desishonnan ku hende ta tuma na nivel lokal, regional i internashonal. WIDECAST tin un funshon importante den e desaroyo di e STRAP. E Wider Caribbean Sea Turtle Conservation Network ta un ret internashonal di siensia ku ta konsistí di ekspertonan den e tereno di turtuga den mas ku 40 pais i teritorio den Karibe. E organisashon di konseho akí ta sigui guianan internashonal i lo aprobá tur dokumentu ku ta resultá for di e seshonnan.