Caribbean Cetacean Society (CCS) a kuminsá ku e promé fase di su ekspedishon anual di bayena i dòlfein den islanan ABC, kuminsando na Kòrsou. E investigashon di 7 dia ta sigi pa Aruba i Boneiru. Na e promé dia kaba na laman, investigadónan a mira mas ku 200 dòlfein di dos espesie distinto, solamente algun ‘mijl’ for di kosta.

Desaroyo sostenibel
Esaki ta e terser aña ku CCS ta organisá un ekspedishon grandi den region, kombinando ekspertisia internashonal ku partnernan lokal. Durante e simposio di CCS aña pasá, Minister di Salubridat Públiko, Medio Ambiente i Naturalesa di Kòrsou a ekspresá interes pa krea un santuario marino pa protehá e rikesa di bayena i dòlfein rondó di isla. Si esaki bira realidat, Kòrsou lo sigui e ehèmpel di Boneiru, Sint Eustatius, Saba i Repúblika Dominikano den esfuersonan pa konservashon marino.

E ekspedishon ta dirigí pa Stacey Mac Donald, Koordinadó Regional di Karibe Hulandes pa CCS: “Komo un yu di e isla aki, mi mishon ta pa segurá ku generashonnan ku ta bini por sigi disfrutá di e rikesa di nos medio ambiente marino, ku tambe ta un di e pilánan di desaroyo sostenibel.”

Stacey Mac Donald

Importansia di bayena i dòlfein
Bayena i dòlfein ta fundamental pa un laman salú: nan ta regulá kadenanan di kuminda, nan ta kapturá  karbon i nan ta yuda pa e ekosistema floresé. Protehá nan ta esensial, no solamente pa biodiversidat, pero tambe pa sostenibilidat na largu plaso di komunidatnan ku ta dependé di laman. Ekspedishonnan di CCS ta sigi un protokòl standardisá ku UNESCO Ocean Decade ta sostené. E datonan kolektá ta kontribuí na konosementu mundial tokante distribushon, migrashon i menasanan di e animalnan.

Potvis © Vincent Kneefel / WWF

Kolaborashon
E ekspedishon di e aña aki ta posibel ku sosten di WWF, Blue Marine Foundation, Kooyman, Delphinarium, CESAM Floreal i Fondation de la Mer. Kolaborashon lokal ta fundamental, ku organisashonnan komo COIA, GMN, FKUP i Piskabon, huntu ku piskadónan lokal, ta traha banda ku sientífikonan den esfuersonan pa monitoriá. E kolaborashon entre gobièrnu i CCS, ku ta kombiná vishon polítiko ku ekspertisia regional, ta forma e yabi di éksito.