Traha huntu ku naturalesa pa resolvé problemanan sosial

Kon nos por traha huntu ku naturalesa?

Naturalesa ta nos aliado pa resolvé problemanan sosial manera kambio di klima. Por ehèmpel, nos tin mester di mondinan, riunan, ‘graslanden’ i oséanonan saludabel pa apsorbé CO2 i tene e klima stabil. Refnan di koral i mondinan di pal’i mangel ta protehá nos kostanan komo ‘kibra-ola’ natural kontra wer ekstremo. Áreanan saludabel di awa dushi ta esensial pa por tin sufisiente awa di bebe.

Ku e solushonnan akí, yamá solushonnan basá riba naturalesa òf solushonnan natural, nos no ta solamente kombatí kambio di klima, pero tambe nos ta reforsá e biodiversidat i nos propio kondishonnan di bida i salú. Komunidatnan lokal ta usa tipo di solushonnan similar pa problemanan sosial ya pa hopi aña kaba. Tambe ta importante pa enbolbí e poblashon lokal pa por yuda pensa i bin ku e tipo di solushonnan akí. Nan ta eksperensiá e problemanan hopi biaha di aserka, manera por ehèmpel inundashon, i nan ta ser afektá pa kambionan den nan área, manera leinan nobo òf desaroyo di proyektonan.

Palunan di mangel ku koralnan abou © naturepl.com / Alex Mustard / WWF

Kon solushonnan basá riba naturalesa ta traha?

Dikon nos mester di solushonnan basá riba naturalesa?

Nos mundu ta konfrontando un kantidat di problema ku nos mes a okashoná. Pèrdida di biodiversidat, kambio di klima, i naturalesa ku ta disparsiendo. Miónes di animal i mata ta ser menasá ku ekstinshon i nos komo hende tambe ta haña hopi molèster debí na e kambionan akí.Tin olanan di kalor mas frekuente i tin ménos kuminda i awa disponibel, e nivel di laman ta subi, tormentanan ta tuma lugá ku mas frekuensia, i hopi mas.

Na mes momentu mitar di mundu ta direktamente dependiente di e uso di fuentenan natural pa nan entrada. Spesialmente sektornan manera agrikultura, peska, maneho di mondi i tambe turismo ta ser influensiá pa e menasa di kambionan den naturalesa. Asina matanan i loke ta ser kultivá ta muri debí na sekura, i piskánan ta muri debí na kalentamentu di laman.

Ku solushonnan basá riba naturalesa nos por atendé e problemanan akí i nos por sòru pa mantené e fuentenan esensial di naturalesa.

Kiko WWF ta hasi?

Rònt mundu WWF ta traha na solushonnan basá riba naturalesa. Nos ta desaroyá inisiativanan ku enfoke riba nesesidatnan di e hende pa medio di restorashon di naturalesa. Asina nos por mustra e bentahanan di solushonnan basá riba naturalesa i nos ta usa siensia pa sostené nos. E derechonan di poblashonnan nativo ta na promé lugá den nos ideanan i nos ta boga pa mas espasio pa esaki via kambio di maneho. Dor di krea bon ehèmpelnan WWF ke stimulá finansiadónan grandi rònt mundu pa invertí mas den solushonnan basá riba naturalesa.

 

Ehèmpel di proyekto: Pal’i mangel

Palunan di mangel ta palunan diverso ku ta kontribuí na biodiversidat i ta kapturá 7.5 pa 10 biaha mas CO2 ku selvanan tropikal! Nos a finansiá un programa di restorashon di pal’i mangel na Kòrsou. E meta ta pa konstruí ekosistemanan na kosta ku ta resistente na klima i saludabel, i ku lo protehá komunidat kontra eventonan di wer ekstremo i otro eventonan di klima. Nos ta logra esaki dor di planta pal’i mangel i hasi investigashon tokante áreanan di pal’i mangel. Pa halsa konsientisashon tokante e importansia di ekosistemanan na kosta, e komunidat lokal lo ta aktivamente enbolbí den e proyekto i tambe lo organisá seshonnan edukashonal.

Dutch Caribbean Nature Alliance (DCNA) lo hasi un estudio di faktibilidat tokante restorashon di kostanan den Karibe. E meta primordial di e proyekto akí ta pa evaluá e potensial pa implementá inisiativanan pa restorá i konservá pal’i mangel i yerba di laman den nos region.

Historia di refnan

Deskubrí nos eksposishon >