Kiko ta pasando?

Turtuganan ta na peliger. E awa di laman ta subiendo, loke ta nifiká ku tin menos lugá pa pone webu. Ora un playa ta muchu drùk, un turtuga na estado no ta dùrf pone su webunan einan. I si e hasi esaki mes, probablemente lo hòrta e webunan aki pa kome, òf e turtuganan chikí no por yega laman despues ku nan sali for di e webu.

E oséanonan tambe ta birando dia pa dia mas sushi. E turtuga ta sufri hopi di esaki, pasobra un laman sushi ta malu pa nan salú. Polushon di plèstik ta un di e menasanan mas grandi pa e animal aki. Nan ta brua kere ku e plèstik ta kuminda, nan ta komé i nan ta sinti nan mes yen. E ora ei, nan ta stòp di kome kuminda nutritivo i nan ta keda ku hamber. Tambe nan ta stek den sushi di plèstik i nan ta keda pegá den redanan bieu. Asina e animalnan ta hoga.

Dikon ta asina importante pa protehá e turtuga?

E turtuga no parse un animal yagdó, pero hopi biaha e ta. E ta garantisá un bon balansa den e sistema ekológiko di e oséano. E hawksbill turtle, por ehèmpel, ta kome animalnan di spòns, ku ta animalnan ku por kompetí ku koral. I e leatherback turtle ta kome kwal, ku na su turno ta pone ku e kantidat di piskánan ta keda haltu. Kwal ta kome e kuminda di piskánan chikitu manera planktòn. E turtuga bèrdè ta kome yerba di laman i ta fungi komo hardinero di laman, pasobra e ta tene e yerbanan di laman saludabel.

Nos ta trahando pa establesé áreanan protehá pa garantisá ku turtuganan por tin espasio adekuá pa pone webu, rutanan seif di migrashon i nan habitat adekuá pa haña kuminda. Nos ta urgi gobièrnunan pa bini ku reglanan mas severo.  Pa redusí e ‘bycatch’ di turtuga, nos ta trein piskadónan pa usa ekiponan spesial i e asina yamá circle hooks. Huntu ku organisashonnan ku ta sosio manera Sea Turtle Conservation Bonaire nos ta  traha huntu ku skolnan pa hasi hende konsiente tokante e peliger – i konsekuensianan ku plèstik tin den oséano. Tambe nos ta traha ku gruponan lokal pa yega na un manera pa resiklá plèstik den produktonan benefisioso. Lesa mas tokante otro proyektonan di WWF pa protehá e turtuga: https://www.worldwildlife.org/species/sea-turtle

E turtuga

E turtuga ta un go-getter. Pa pone webu, e turtuga muhé hopi biaha ta landa miles di mia bai bèk e playa kaminda e mes a nanse. E sa eksakmente kon pa landa,  no ta ningun problema pa e haña su kaminda. E momentu ku e ta pone webu ta e úniko momentu ku e turtuga ta sali for di awa. E tin un rason pa hasi esaki, e turtuga ta pone 100 pa 200 webu den un biaha!

E temperatura di e tera ta determiná si e turtuga yòn ta bira maskulino òf femenino. Ora e webunan kibra, e turtuga ta kruip pa laman den un forma independiente. E turtuga por bira hopi bieu, algun di e animalnan aki por biba mas ku 100 aña! Tin 7 espesie di turtuga. Kasi tur e espesienan ta gusta bestianan di laman, ku eksepshon di e green sea turtle. Esei ta gusta yerbanan.