Naturalesa ta sigui deteriorá den henter mundu, pero Latinoamérika i Karibe ta e regionnan mas afektá. E Living Planet Report 2026 di WWF ta mustra ku e poblashonnan di bestia salvahe ku nan a monitoriá den e region akí a baha ku un averahe di 95% entre aña 1970 i 2022, kompará ku 73% mundialmente.

Menasa

Latinoamérika i Karibe ta pertenesé na e regionnan ku mas biodiversidat na mundu. Tin seis di e shete paisnan riba e kontinente amerikano ku un biodiversidat haltu ta situá den e region akí. Pero naturalesa den e region ta enfrentá hopi menasa. Mondinan, saliña i ‘graslanden’ ta disparsé òf tin daño, miéntras tantu ku konstrukshon di dam ta kambia e kurso natural di riunan. Otro menasanan ta inkluí eksplotashon eksesivo di espesienan, kambio di klima i malesa.

Ademas, e regionnan akí ta entre esnan mas vulnerabel na mundu ora ta trata kambio di klima Nan ta eksperensiando kaba kalor ekstremo, periodonan largu di sekura i orkan ku ta bira kada bes mas fuerte. E resultadonan ta mustra e nesesidat urgente pa protehá i restourá naturalesa den Latinoamérika i Karibe.

Huntu pa speransa

Apesar di e pèrdida grandi di naturalesa, e Living Planet Report ta mustra tambe ku resiliensia ta posibel ora nos protehá naturalesa durante un periodo largu. Turtuga bèrdè ta un di e ehèmpelnan mas mihó pa esaki.

Na 2025, e status di e spesie aki riba e Lista Kòrá di IUCN a kambia di menasá (Endangered) pa no menasá (Least Concern). Ku esaki, turtuga bèrdè a bira e promé espesie di turtuga den laman ku a logra e esaki. E rekuperashon akí ta resultado di mas ku 50 aña di trabou di konservashon den mas di 80 pais kaminda e espesie ta pone webu.

E medidanan ta inkluí protekshon di turtuga muhé ku ta pone webu i nan webunan, mihó maneho di playa, redukshon di kaptura aksidental durante piskamentu, prevenshon di kaptura ilegal i kolaborashon ku komunidatnan lokal. Huntu e esfuersonan akí a kontribuí na rekuperashon di turtuga bèrdè.

Turtuga bèrdè © Casper Douma

Konservashon di naturalesa den Karibe Hulandes

Wereld Natuur Fonds (WWF-NL) ta traha huntu ku partner lokal i regional den Karibe Hulandes pa protehá i restourá naturalesa. E programa di Karibe Hulandes ta enfoká prinsipalmente riba áreanan na kosta ku por resistí mihó e efektonan di kambio di klima. E enfoke tambe ta riba protekshon i rekuperashon di animalnan emblemátiko manera turtuga, bayena, dòlfein i tribon.

Refnan di koral, palunan di mangel i di yerba di laman ku ta salú ta importante tantu pa bestia komo hende. Nan ta ofresé kuminda i refugio na hopi espesie, ta yuda protehá kosta i ta hasi e islanan mas resistente kontra kambio di klima.

WWF-NL ta kolaborá ku organisashon lokal di konservashon, investigadónan, gobièrnu i komunidat lokal pa protehá i restourá e áreanan natural akí i e spesienan ku ta dependé di nan. Roxanne-Liana Francisca, mènedjer di e programa di WWF-NL pa Karibe Hulandes, ta splika:

“E manera di gana pan i e bienestar general di e poblashon den Karibe Hulandes ta konektá ku un naturalesa saludabel. Konsiente di esaki, hopi organisashon lokal, tantu grandi komo chikí, ta traha duru pa krea konsientisashon miéntras ku nan ta protehá i restourá e rikesa natural úniko di e islanan.”

Pal’i mangel i pelikan © Casper Douma

Tokante Living Planet Report

Kada dos aña ta publiká e Living Planet Report. E Living Planet Index, prepará pa Zoological Society of London, ta sigui kambio den e poblashonnan di espesie manera anfibio, para, piská, mamífero i rèptil. E Living Planet Index 2026 ta inkluí 35.803 tendensia di poblashon di 5.790 espesie ku nan a monitoriá entre 1970 i 2022.

E bahada di 95% no ta nifiká ku 95% di tur bestia salvahe na Latinoamérika i Karibe a disparsé. E ta nifiká ku e poblashon di bestia salvahe ku nan a monitoriá a bira mas chikí, na averahe for di 1970.