Arjan de Groene, Koordinadó di Karibe

Ku su entrenamentu komo biólogo marino, Arjan a pasa hopi tempu rondó di refnan di koral i e hendenan ku ta dependé di nan. El a investigá e konekshon entre palunan di mangel (mangrove), yerba di laman, i refnan di koral na Zanzibar i Kòrsou i a traha mapa di refnan di koral na Seychelles. E tin masha interes pa sa kon ekosistemanan marino ta funshoná, i mas importante ainda, kon nos por sigurá ku e mondinan tropikal magnífiko akí ku ta bou di awa, lo keda intakto i sigui sostené e hendenan ku ta dependé di nan.

Esaki ta un di e motibunan ku el a disidí di guia un organisashon no-gubernamental lokal di naturalesa na Seychelles pa traha un brùg entre konservashon di islanan i sektor privá, pa restorá islanan chikí komo refugionan di biodiversidat pa espesienan di animal den peliger di ekstinshon. For di 2016 Arjan ta traha komo koordinadó di e Programa di Karibe di WWF-NL, dunando sosten na nos timnan lokal na Boneiru i otro lugánan, pa traha ku organisashonnan i komunidatnan lokal pa sigurá ku futuro generashonnan lo por disfrutá di e bunitesa i benefisionan di refnan di koral saludabel i espesienan emblemátiko manera bayena, turtuga i tribon.

Monique van de Water, Program Manager

Manera su nòmber ya ta indiká, Monique tin un pashon pa laman. For di e promé biaha ku el a sambuyá (duik), el a keda fasiná pa e mundu bou di awa, su bunitesa, e animalnan, e área enorme, profundidatnan, i kolónan di laman.

Monique tin un trayektoria amplio den konservashon di laman. E tabatin diferente ròl na vários organisashon di konservashon marino i e den e delaster 15 aña pa WWF-NL den área di konservashon di oséano. E tin un Master’s den Biologia i unu den Maneho Ambiental i Lei, i el a kuminsá su karera trahando ku mamífero marino.

E formashon akadémiko akí huntu ku su eksperensia di trabou ta masha útil den su posishon aktual komo Program Manager pa e Programa di Karibe Hulandes. E ta komprometé na protehá sistema di kosta (manera refnan di koral i pal’i mangel) i espesienan marino emblemátiko (tortuga, bayena i dòlfein). Monique ta gusta kolaborá ku tur ‘stakeholder’ pa transmití e nesesidat i posibilidatnan di kambio pa preservá e oséano pa futuro generashonnan. Den su tempu liber e gusta disfrutá laman dor di bai sambuyá i nabegando oséanonan.

Stacey Mac Donald, Konsehero di Programa

Stacey a djòin e tim di WWF-NL na novèmber 2020 pero el a traha ku WWF-NL for di 2017. El a nase i krese na Kòrsou, i semper tabatin masha interes den e interakshon entre hende i medio ambiente. Stacey ta traha komo konsehero di programa pa e Programa di Karibe Hulandes, i e ta traha huntu ku e tim na enbolbimentu di komunidat, maneho di peskeria, gobernansa, i protekshon di espesienan di animal den region di Karibe.

E tin un grado di PhD den Sikologia i Antropologia i su investigashon a enfoká riba komprondementu di e prosesonan sosial i sikológiko ku ta guia konservashon di naturalesa den Karibe. Su enfoke ta riba kreashon di ambientenan harmonioso i saludabel pa tur, dor di guia i fasilitá prosesonan inklusivo di maneho lokal di konservashon riba tur e diferente nivelnan den komunidat.

Carolyn Caporusso, Konsehero di Programa

Carolyn a bin ta koordiná Clean Coast Bonaire, un programa basá riba trabou di boluntarionan pa kontrolá sushi marino na Hulanda Karibense na nòmber di WWF-NL for di 2018. Resientemente el a ekspandé su ròl i a bira un konsehero di programa pa e Programa di Karibe Hulandes na yüni 2022.

E ta un edukadó eksperensiá i un defensor di medio ambiente, i su logronan profeshonal ta inkluí koordinashon internashonal di disputanan legal tokante seguro medioambiental, desaroyo di programanan edukashonal pa sambuyadónan, i maneho di sentronan di sambuyá. El a koordiná limpiesanan di gran eskala kaminda siudadanonan ta yuda limpia bou di laman, el a inisiá Debris Free Bonaire, e ta sirbi den e hunta di A Plastic Free Bonaire, i el a traha e Plan di Akshon pa harmonisashon di kòntròl di sushi den region di Karibe. E ta spera ku su trabou ta enfatisá dikon e medio ambiente marino ta importante, i kua pasonan nos tur mester tuma pa protehá nos balioso rekursonan natural.

Evita Sanches, Konsehero di Komunikashon

Evita ta un eksperto den komunikashon kende ta gusta K.I.S.S. (Keep It Short and Simple). E ta kombertí informashon (tin biaha kompliká) tokante konservashon di naturalesa den Karibe Hulandes, den mensahenan i historianan konsiso pa tene tur kos simpel i kòrtiku pa tur públiko. Na WWF e ta responsabel pa e tareanan di komunikashon relashoná ku e Programa di Karibe Hulandes.

E ta apliká e konosementu ku el a optené di su grado di Master den Siensia di Komunikashon i su eksperensia komo consultant di merkadeo i komunikashon, pa krea strategianan di komunikashon pa e region, ku e propósito pa informá, eduká, i enbolbí otronan. Evita a biba i traha na Hulanda, Spaña, i Maroko, pero e ta keda un mucha tropikal. El a nase i krese na Sürnam i aktualmente ta biba na Kòrsou. Ora ku e no ta trahando, bo por hañ’é ta pasa tempu pafó, disfrutando di naturalesa.