Traha Huntu ku Partnernan Lokal
“Si bo ke bai lihé, bai bo so. Si bo ke bai leu, bai huntu.” E famoso proverbio afrikano aki ta mustra e kurason di nos trabou. Konservashon di naturalesa ta koperashon. Nos ta logra mas si nos traha ku otro.
Hopi biaha WWF ta esun ku ta konektá ora ta trata protekshon di un área. Tambe nos ke trese tur partido ku ta interesá huntu. Esaki ta varia di organisashonnan lokal, kompanianan, gobièrnunan te na e pueblo. Nos no ke djies skucha, pero preferiblemente nos ke lanta un proyekto huntu i determiná kiko mester ser hasí. Hasiendo esaki, nos ta trata di representá tur hende su interesnan mas mihó ku ta posibel. Den e ret di WWF nos ta yama esaki ‘konservashon inklusivo’. Nos ta traha hopi serka huntu ku partidonan manera Entidat Públiko, Water en Energiebedrijf Bonaire N.V., Clean Coast Bonaire, Sea Turtle Conservation Bonaire, Dutch Caribbean Nature Alliance i e outoridatnan di maneho di e parkenan di tur seis islanan den Karibe Hulandes ku nan ta representá, PISKABON i muchu mas.
Hóbennan pintando un kliko, partisipando den e Sushi òf Dushi Kliko Challenge in Bonaire. © Kenny Ranking / WWF-NL
Komunidat Lokal
Na WWF, nos ta kere ku hende ta e kurason di nos trabou di konservashon. WWF ta traha den aproksimadamente 100 pais. Tambe áreanan isolá i peligroso kaminda rekursonan natural di hende i animal ta ser menasá dor di aktividatnan ilegal, ta inkluí den e paisnan aki.
Nos ta traha huntu i ku rèspèt ku personanan lokal i indígena. E aserkamentu aki ta un prinsipio sentral pa WWF. Den e forma aki, nos trabou tambe ta benefisiá e populashon lokal. Traha huntu ta krea desafionan, pero pa por suprasá esaki ta hasi e solushonnan èkstra balioso.
Nos ta logra nos gran éksito ora nos pensa i implementá solushonnan huntu ku e komunidatnan lokal ku no ta solamente bon pa naturalesa, pero ku tambe ta duna bienestar i prosperidat na e hendenan ku ta biba i traha den e área aki.
Sea Turtle Conservation Bonaire poniendo un turtuga bèk den awa. © Amy L. Weir
Ret amplio
Hopi biaha nos ta traha ku organisashonnan lokal. Nan ta ser manehá pa personanan ku ta konosé i ku ta representá e medio ambiente, e historia i tur e interesnan enbolbí. Tambe: nan tin un ret amplio i asina por yega na e personanan korekto. Nan ta papia e idioma literal- i figurativamente. Pesei hustamente e tipo di organisashonnan aki ta balioso pa traha ku nan.
Bon relashon ku gobièrnu lokal
Outoridatnan lokal i regional tambe ta partnernan importante pa WWF. Pa por influensiá formashon di maneho i pa gana sosten amplio pa nos trabou, un bon relashon ku gobièrnu ta di gran importansia. Nos ta informá i konsehá nan riba legislashon i regulashonnan ku ta duna tantu e naturalesa komo e populashon lokal un futuro sostenibel. Un ehèmpel di esaki ta e kolaborashon ku gobièrnu lokal i nashonal di Reino Hulandes tin pa salba e refnan di koral den Karibe Hulandes.
Kontribushon Positivo
Kompanianan por ta parti di e problema òf nan por usa nan influensia i nan forsa inovativo pa forma parti di e solushon. Asina nan por agregá balor na nan kompania na mesun momentu. Organisashonnan prominente sa bon ku éksito no ta trata solamente di kresementu. Sostenibilidat no ta nifiká solamente ku ta ménos daño ta ser hasí. Pa prosperá, negoshinan mester ta konsiente di nan mes i nan mester duna na hende i planeta mas bèk ku loke ta kita for di nan.
