E naturalesa bunita i úniko di e seis isla den Karibe Hulandes lo ta e aktor prinsipal den e pelíkula WOW! Caribbean Nature Uncovered, ku lo ser presentá den sine. E proyekto akí ta trese diferente partner hunto, inkluyendo WWF-NL i Dutch Caribbean Nature Alliance (DCNA). E meta ta pa inspirá i motivá e públiko pa protehá naturalesa, ku un enfoke riba e vulnerabilidat i e resiliensia di e ekosistemanan spesial akí.

Hunto pa protehá naturalesa

WWF-NL ta dediká pa mas naturalesa via protekshon i restourashon di naturalesa rònt mundo, tambe riba e islanan Karibense Hulandes. E islanan akí tin rònt di nan refnan di koral i palunan di mangel i espesie marino ikóniko manera bayena, dòlfein, tribon i turtuga, kual ta naturalesa spesial. I e naturalesa akí ta kontribuí na kuminda i entrada di e habitantenan i na felisidat di bishitantenan ku e islanan ta risibí regular. WWF-NL ta traha riba e islanan huntu ku habitantenan i partnernan lokal pa protehá i restourá e naturalesa regional. E programa di Karibe Hulandes di WWF-NL ta prinsipalmente enfoká riba ekosistemanan na kosta i animalnan marino ikóniko.

Konsientisashon

Aparte di protehá espesienan i áreanan, edukashon i konsientisashon tambe ta un parti importante den e programa. P’esei WWF-NL ta traha hunto ku partner lokal DCNA pa desaroyá proyekto di edukashon pa hóben riba e seis isla. Via e programa WOW-ies, e proyekto ta uni arti­stanan, ekspertonan di naturalesa, dosente­nan i mucha­nan pa hasi loke WOW! ta representá: konektá dor di atmirashon, kreatividat i amor pa naturalesa.

E maskotanan kolorido, e WOW-ies, ta yuda konta e historia úniko di naturalesa riba kada isla. Durante tayernan, e mucha­nan ta eksplorá nan medio ambiente, ta kompartí kiko ta hasi nan isla spesial, i ta ekspresá e konekshon akí pa medio di arte, weganan i siñamentu. E proyekto no ta solamente pa traha un pelíkula òf series dokumental. E meta prinsipal ta pa krea un komunidat ku ta empoderá talento lokal, ta sostené edukashon ambiental i ta inspirá akshon pa protehá e bunitesa ku ta rondoná nos.

E kolaborashon ku WOW! Caribbean Nature Uncovered ta un paso bunita den e mishon pa protekshon di naturalesa, kaminda naturalesa di e islanan Karibense ta risibí e atenshon ku e meresé. E islanan akí ta karga un biodiversidat riku ku hopi biaha no ta ser apresia òf hasta ignorá. Via un pelíkula úniko, e produktornan ke pa tur hende por disfrutá di naturalesa di e islanan i stimulá e kuido kompartí pa e naturalesa akí.