Reef Renewal Foundation Curaçao (RRFC) ta dediká na protehá i fortalesé e koralnan riba e isla. Un donashon di e INNO-Fund di WWF-NL i dosena di otro donantenan generoso, a hasi posibel pa RRFC por a eksperimentá ku un diseño di kwekerij di koral ku por ta mas simpel i barata, usando kabuya pa remplasá e tradishonal palunan pa krese koral ku ta trahá di PVC. Reef Renewal Foundation USA a sugerí pa RRFC djòin nan pa eksperimentá ku ponementu di fragmento di koral den e parti di flèktu di un kabuya. E idea akí a keda sugerí originalmente pa Andrew Ross di Seascape Caribbean na Jamaica.

Resúmen di Proyekto

Na 2023, RRFC a pone un meta ambisioso pa instalá 100 kwekerij vertikal di kabuya (Vertical Rope Nurseries – VERNs) pa oumentá su kapasidat di kweek. Te ku awor, nan a instalá mas ku 75 VERNs. Dor di purba i hasi eror, e organisashon a siña lo siguiente:

• Kabuya di katuna ta biodegradabel, pero e ta degradá demasiado lihé den e fase di kweek, i ora e ser trasplantá ku koral, e kabuya di katuna ta bira un akumulashon di lima ku fibra di kabuya gastá, loke ta sofoká e koral. P’e motibu ei, polipropileno ta traha mihó ku katuna.
• Mester ta kuidadoso i krese Elkhorn coral den e kwekerij entre 17 i 4 pia for di e superfisie, i tin chèns ku mester baha e kabuyanan durante eventonan kaminda e awa ta bira kayente.
• Ounke e VERNs ta rekerí ménos mantenshon, periódikamente nan mester ser limpiá pa kita e akumulashon di lima i otro organismonan ku ta krese riba e kabuya i ta kita espasio for di e koralnan.
• Si e VERNs di Elkhorn coral keda na e altura apropiá i haña mantenshon adekuá, e Elkhorn coral lo kubri e kabuya kompletamente i lo no tin mester di limpia e kabuya mas.

Esfuersonan di e tim

RRFC ta sigui eksplorá vários método i materialnan pa mehorá e téknikanan inovativo pa tin éksito ku restourashon di koral. Ku solamente dos empleado i dos stazjèr, RRFC tabata hopi produktivo a pesar di tin rekursonan limitá. Algun punto ku a destaká den e resultadonan di e último aña i mei:

• A trasplantá 2,000 koral ku ta na peliger di ekstinshon.
• A trata sentenáres di koral afektá pa e Stony Coral Tissue Loss Disease.
• A instalá un kwekerij nobo di e koralnan manera baranka di piedra (boulder coral) ku 1,100 fragmento di koral nobo di 4 espesie nobo.
• A mantené 50 palu pa krese koral na 5 sitio, kual ta kontené un total di 2,500 koral.
• A desaroyá kolaborashon (partnership) ku laboratorionan marino pa propagá espesienan nobo di koral.
• A sertifiká mas ku 100 sambuyadó komo PADI Coral Restoration Curaçao Divers.
• A sambuyá parti anochi na 10 okashon pa monitoriá e spawning di koral i a dokumentá e spawning di dosena di kolonia di koral ku a ser trasplantá.
• A duna tour di snòrkel na diferente kwekerij di koral pa mas ku 300 huéspet di LionsDive Resort.